ما تقطّعيش كل الحبال
دنا وانتى لسه بنبتدى
لسّه الخطاوى بتهتدى
ع السكة من شكل النجوم
ف بلاش تحُطّى هناك غيوم
تمنع ضياها يدلّنا
خلّينا ساكنين بعضنا
ونعيش حياتنا بالأمل
بينا الربيع رح يكتمل
ف تعالى نقطف م الورود أجمل عبير
وتعالى ع الأشجار نطير
قبل الخريف المُحتمل
دنا قلبى كان عطشان غرام
وبيستخبّى ف دقّتين
الأولى لمّا الناس تنام
تطلع تغنّى للأنين
والتانيه كانت تحدفُه
على سكّه فيها المجروحين
دلوقتى ليه لمّا ابتدا
يدخل طريق العاشقين
بتقطّعى كل الحبال؟
يا حبيبتى حاولى تفهمى
الحُب لمّا يكون برىء
قادر يعدّى من الجبال
ومن البحور.. ومن السحاب
الحُب مش كلمه ف كتاب
تتقال يادوب عدد الحروف
الحُب وسط العتمه شوف
يوصل لأبعد م المدى
يستدعى كل اللى انقضى
ويخطّى بيه بكره اللى جى
الحُب جُرأة قلب حى
ما يخافش أبدا أى خوف
بيطير كما طير الحمام
وبيرمى ع الأرض السلام
ويكون ف وسط الناس إمام
ووراه من التابعين ألوف
وإن حد حاربه بتلاقيه
فارس شجاع
بيكون ف أول الصفوف
وانا قلبى حالف يعشقك
حالف ليدخل معبدك وهناك يطوف
ما تقطّعيش كل الحبال
د الحُب عمره ما كان كلام
ولا عمره يرضى يكون ف يوم
حسب الظروف
صورة أرشيفية
لا توجد تعليقات على الخبر
تم أضافة تعليقك سوف يظهر بعد المراجعة