أنا كويس
وعادى وفل كله تمام
مفيش بس الحياه يعنى
مصره وحالفه توجعنى
وبترجعنى للماضى
بقيت راضى
موافق باللى ما هو آت
بعيش فالذكرى والحكايات
بقيت فاظه
وصوره وذكرى مركونه
مليش تأثير على الأحداث
مبتكلمش بالأيام
وباخذ جرعه مالوحده
وبرسم دنيتى فواحده
وبرجع بالسنين وبقول
مسير العيشه تتعدل
وحال القلب يتبدل وأعيش مبسوط
بقيت كرة وكل الخلق تيجى تشوط
بقيت مركب وبحر وسيما مهجوره
لانا عايش ولا ميت ولا صادق ولا كذاب
حيادى وكنت طول الوقت رادد الباب
برتب أولوياتى
على الناس اللى فى حياتى
لقيت الكل حقه وأصله بزياده
وأنا اللى حياتى ناقصه كتير
يجوز تقدير .. يجوز راحه
برتب روحى بالراحه
وبرسم ليل وموج هادى
بقيت عادى ..
طبيعى بشكل مش عادى
فى قعدة أُنس عالقهوة
هكون بلياتشو ضحكتكم
وحزن القلب متخبى
فكان ذنبى
بحن بسرعة وانسى اوام
بخاف مالوحدة فبجلكم
وبعمل نفسى نور بينكم
وبعمل سيما بالأيام
وبعمل بيت
وبعزل نفسى لو حبيت
وبعمل نفسى أرض وبحر
بسافر باللى فاضل منى
وبرجع تانى وكأنى
محستش الوجع من قبل
ولا شفت السنين وبكيت
أنا ترانزيت !!
هتلقانى فى ليل غامق
ورعشة برد عالكرنيش
هتلقانى فأول مد للأحلام
وفى آخر طابور العيش
بحب الطيش
وأخاف من كل شىء عابر
وبعشق لسه سفر الليل
وحضن البحر بعد الفجر
وأموت لو حد قال الهجر
يجوز ببعد .. وبعدى سبيل
عشان أفضل جميل بينكم
متتخضوش أنا لسّانى بسمعكم
وهفضل حضن بيساعكم
وبيت هيضمكم فالبرد
وقلب يقدملكم ورد
فمتحكموش على غيابى
مجرد فتره مش أزمه
مجرد وقت ويعدى
وأعود بحار فى قعدتكم
عابر سبيل فى سكتكم
ورح محبوسه فالقهوة
وحضن يدفى لو بردان
وقلب يسلمك روحه
يداوى جراحكوا بجروحه
ويرسم ليكوا كون ألوان
فقولوا كلام كتير عنى
وعالخلق اللى تشبهنى
مبنحبش وجود الناس
وفى وجودهم بنعشقهم
بنضحك بس جوانا وطن للخوف
هتلقانا فى كل خيال وكل ظروف
وكل حنين وكل سلام
هتلقانا فى صوت أنغام
ترانزيت الحياه ديا
وفتره ووقت بيعدى
أنا لسَّانى على وعدى
لا عمرى جريت
ولا نسيت اللى حبتنى
ولا كرهت اللى نسيتنى
ولا مليت دموع الشتا
فعندى كلام
أنا وفصيلتى مالعايشين
أكيد عارفين بأن حياتنا دى فترات
ولعنتنا بنتعلق
ونتشعلق
ونبنى حياتنا عالغارب
بنمشى طريق بدون قارب
ينجينا
فرفقاً بينا قدر متاح
يجوز نرتاح
يجوز ننسى الوجع والآه
ونفتح تانى شبابيكنا
ونرمى الورد عالماشيين
ونضحك ضحك يشبهنا
ويشبه برضو ناس تانيين
ونفرح باللى حققناه
فتبقى حياه ..
