فيسبوك
واتساب
وجهة نظر.. السواقة فى مصر عالم كبير.. يتكتب فيه كتب ومجلدات!!، وسلوكيات السواقة أكبر بكتير من مقالة واحدة.. لكن لا مانع من محاولة متواضعة نفضفض فيها، ونعبر عن مشاكلنا اليومية..
من حقك تركن عربيتك قرب بيتك، لكن.. مش من حقك تحجز مكان..، من حقى أنا كمان أركن قرب بيتى!
من حقك توصل بسرعة.. لكن أكيد مش هتمشى عكسى وتعطل الطريق، وتعرض غيرك للخطر.
من حقك تكون مستعجل.. من غير ما توتر غيرك بأنوارك وملاحقتك له، واستخدامك للشارع من أقصى اليمين لليسار!
من حقك كمان تمشى على مهلك لو حبيت، بس مش لازم أقصى اليسار!.. المفترض أن اليمين هو المكان المخصص للسير البطىء!!
من حقك تدخل يمين أو شمال.. ومن حقى توضح لى بإشارة تفهمنى ناوى على أيه!، ومن غير مفاجآت غير سعيدة .
من حقك تقف توصل المدام أو الولاد .. بس من فضلك متقفش فجأة ولا تعطل الطريق.. ممكن ببساطة تقف على جانب ومتعطلش غيرك.
من حقك تنزل تشترى احتياجاتك، أو تروح مشاويرك كمان.. لكن مش لطيف أبداً أنك تركن صف تانى وتعطلنى.
من حقك تحافظ على سيارتك نظيفة.. لكن مش على حساب نظافة الشارع!!، وأتمنى تكون فاهمنى..!
كل دى مجرد عينات وأمثلة من مواقف يومية فى الشوارع المصرية، من فضلك الشارع مش ملكك وحدك، راعى الآخرين، من حقك تعيش، ومن حقنا نعيش مرتاحين!!
