فى بلدنا الحبيبة شباب زى الورد، عندهم أفكار، عندهم أمل فى بكره، عندهم طاقة متجددة يوميا فى التحمل على قدرة العمل الشاق فى أى شىء، يجى شاب يقولك والنبى شوفلى مصلحة معاك فى شغلك، تتشل ما تبقاش عارف ترد، يجى شاب تانى يقولك: أنا مش لاقى شغل خالص ودورت كتير والدنيا مسودة فى وشى، وأسأله: أنت مخلص تعليمك؟ يقولى آه، أقوله خريج إيه؟ أتفاجأ بأنه خريج «حقوق - تجارة - معهد عالى 4 سنين»، ماببقاش عارف أرد عليه، طب يا ترى الأم اللى شقيت وتعبت وسهرت فى الامتحانات، والأب الذى يقوم من نومه بدرى يوميا، ويرجع آخر الليل عشان يصرف على ابنه وولاده وبيته، ويتحمل أى مشقة عشان يشوف ولاده أحسن منه يعمل إيه لما ابنه ياخد البكالوريوس، وبعد ما ابنه يخده ما يلاقيش وظيفة، يقوم الشاب عشان يعتمد على نفسه، فيضطر يشتغل أى حاجة ملهاش علاقة بشهادته، يشتغل أى حاجة عشان يصرف على نفسه، فى فرن فينو، فرن عيش بلدى، يشتغل سواق توك توك، سواق تاكسى، أو فى مطعم، يشتغل أى شىء لمساعدة نفسه دون الاعتماد على الأب الذى شقى وتعب وكبر وعلم من وهو طفل، علشان يحوش ويجيب شقة ومصاريفه اليومية، ولو محتاج أى شىء يجيبوا من غير ما يقول لأبوه اللى بيجهز إخواته البنات، اللى كبروا وليهم حق عليه.
طيب السؤال: ليه المتفوقين بعد ما يتخرجوا ما بيلقوش وظيفة حكومية وليه لما بنبص على موظفى الحكومة نلاقى كلهم كبار فى السن وحتى اللى بيطلع معاش بيبقا عايز يدخل ابنه مكانه.. ليه؟
ليه الشغل فى الحكومة صعب مع أن المرتبات فى الوظايف الحكومية أقل منها فى المؤسسات الخاصة؟
هل الصعوبات التى يواجهها الشباب فى الحصول على وظيفة حكومية ويرضى بمرتب ضئيل بسبب تأمينات ومعاشات مستقبلية؟
طيب ولو ده صح ليه الجامعة مبتساعدش الشباب فى العمل بعد التخرج، أو يتم التنسيق بين المؤسسات لمساعدة الشباب، وهمه بيدرسوا يتعلموا أى مهنة تفيدهم بعد التخرج، علشان يكملوا مسيرتهم التعليمية بشكل صحيح، ويطبقه اللى اتعلموه، ويكون ناجح ويفيد الوطن بأكمله فى جميع التخصصات والمجالات التعليمية.
لو فعلا الدولة فكرت فى توجيه الشباب فى هذا الاتجاه هيعود بالخير على الوطن.. أقولك فى إيه ؟
أولاً: الشاب اللى هيتخرج مش هيحاول يعمل هجرة غير شرعية وفى الآخر يموت فى وسط البحر والسمك ياكله .
ثانياً: الشاب لما يلاقى شغل بعد تخرجه هيعتمد على نفسه وعلى مصدر رزقه حتى لو كان المرتب قليل.
ثالثاً: هنقضى على ظاهرة الشباب اللى بتقعد على القهاوى ورمية شماعتها على أن الدولة مش موفرة لنا شغل ناكل منه عيش .
رابعاً: هيكون فى إحساس بالمسئولية عند الشباب، وهيحب بلده أكثر من أى شىء، مش هيسيب أهله ويسيب أصدقاؤه وأقاربه ويتغرب، ويقولك أنا عايز أسافر أشتغل بره عشان بلدى مافيهاش شغل .
خامساً: مش هتلاقى بائعين جائلين معاهم شهادات ومتمرمطين فى الشوارع بيبيعوا مناديل.
سادساً: هيكون فى راحة نفسية، وهتلاقى طاقة رهيبة عند الشباب من وهو بيدرس، لأن أهم خطوة بيحلم بيها هتتحقق لما يتخرج، ومش هتلاقى إحباط زى دلوقتى، تيجى تسأل شاب بتدرس إيه؟ بدرس.. أهى شهادة والسلام هتتبروز فى الأوضة عندى وخلاص، ونرجع نقول الشباب ليه بيهربوا من البلد، وبيدوروا على مصدر رزق بره، عن طريق الهجرة غير الشرعية.
مصر هتكون أحسن بلد فى العالم بشبابها وأولادها المخلصين.
