ومين فينا عارف .. هو عايز إيه؟
ومين فينا شايف .. بكره شايل إيه؟
ومين فينا دايس .. وضامن خطوة رجليه؟
ومين فينا بايس .. وش وضهر إديه ؟!!!
--------
كل يوم نفس القرف .. نفس العادات
واللى بنصبح فيه .. فيه هو هو نبات
يا هل ترى العُمر الجميل
هو اللى جاى .. وللا اللى فات؟
--------
يا دنيا عندى سؤال .. واقف بين اللوزتين
أنا مع الحلوين .. وللا مع الوحشين ؟!
ضحكتلى ضحكة رقيعة .. وفنجلت بالعين
وقالتلى يا عم صلى .. ما كلنا بوشين
--------
لو كُلُه سايق العبط .. مين م الألم يعفيك
لو كل القلوب زلط .. مين هيحس بيك
لفيت ف ألف حته .. بدل استشارى سته
كُلُه كتب فى روشته .. ربنا يشفيك
