حمدى نصر يكتب: ظلموا المرأة المصرية وقالوا: إنها نكدية

ادعت أبحاث علمية عالمية بثت نتائجها وكالات الأنباء مؤخراً: إن الست المصرية حصلت على المركز الأول عالمياً فى النكد!!

فتصورت إنه دارت فى خاطر إحداهن خاطرة أنقلها لكم مع احتفاظى بحق الملكية الفكرية :
قال ايه الست المصرية أكبر ست فى العالم حشرية ونكدية؟!
والجرايد والتلفزيون نشروا ولاحدن قال دى فبركة حلمنتيشية!
ولا رجال ولا نسا حطوا فى عينيهم حصوة ملح وقالوا: كدبة كيدية
دانا عن ذات نفسى مكسورة الجناح واتخض من طشة الملوخية
فى ليلة دخلتى أبويا كُتّيمى إدانى خرطوش وسكينه تلمة مصدية
وأمى الحنونة غمزت لى بعينها ودست فى شنطتى بمبة يدوية
وشوشتنى وقالت يابت جوزك باين عليه من صنف حلّق حوش
ادبحيله القطة وخلى دمها بحور تجرى من السرير لحد الحوش
لاعبيه على الشناكل الصنف ده ياضنيا مايجيش إلّا بالبرطوش
وريه نجوم الضهر اكسرى ضهره بعيال أوحش من الوحوش
اتدللى واتعززى ولما يطلبك صهينى وبدحلبة لبسيه طربوش
قوليله عيب ياعمدة الحيطان ليها ودان والجيران مابيختشوش
انا يا حبة عينى قلبى عليك الدوا اللى بتاخدوا باين عليه مغشوش
قوليله بالمفتشر ياادلعادى من هنا ورايح قرايبك كلهم مايجوش
وأمك محرم عليها تعتّب بيتى ولو استجرى يسألك ماتجاوبيهوش
قوليله أمك عامله لى عمل اسود لقيته على عتبة الباب مرشوش
واسمعينى ياغبية حلقة حطيها فى ودانك اللى يارب مايسمعوش
ريحتك دايما تكون طبيخ وشعرك ليفة مواعين أكرت ومنكوش
ولوسهر ع القهاوى خليه يغور الرجالة مايهمش إلا ملو الكروش
الرجالة مالهمش مرارة ودواهم سفة شيح وشمة نشوق ورشوش
وبعد كل ده بيقولوا نكديه منين جابو الكلام ده ياختى انت وهيه؟!
وحياة مقصوصى ما حترضيهم لو ولعتى صوابعك لمبة سهاريه
وفرشتى شعرك على كتافهم فرو واديتيهم عينيكى فوانيس عربية
مادام دا رأيهم اقلبيها نكد وربنا يهد المفترى دعوة وليه ساعة مغربية
يارجالة آخر زمن اتقوا الله فينا الغرب مابيحبش لنا إلا الخناق والأذية
فوقوا بقى احنا القوارير لعيالكم وأسراركم ماتشمتوش فينا العوازلية