محمد صوان يكتب: إلى الشاعر الراحل أحمد فؤاد نجم

الإثنين، 03 أغسطس 2015 03:26 ص

الشاعر الراحل أحمد فؤاد نجم

قبلت التحدى يا نجم بصلابة
كسرت بعنادك مقص الرقابة
صرخت ف عَدَمنا وفلّيت لجامنا
وخلّيت مِدادك دموع الغلابة
***
وسيرت ف طريقك وما حُدت عنّه
برغم اللى خانوا وللظلم غنّوا
وجُودت بأمانك إذا الكل ضنّوا
وحطم صراخك جدار الكآبة
***
يا آهه ف ضميرنا.. ضميرنا اللى مات
بتصرخ عساها تلم الشتات
سنين وانت يا أحمد بتجمع عضامنا
وفيها بتنفخ بتحيى الرفات
***
فى حضن الكنانة مكانك بعيد
دموعها عشانك ميلاد من جديد
وفوق تاجها اسمك
وف عيونها رسمك
كأنك لوحدك يا نجم الوليد
كأنك لوحدك يا نجم الوليد