"حمزة".. أجمد مطعم لـ"البسمتى.. وفطيرة النوتيلا" فيكى يا مصر

نقلا عن اليومى..

موسوعة حرة فى الأكل الحلو، عشاقة بيعتبروه الفانوس السحرى بين المطاعم، واللى ممكن يحققلهم أى وجبة بأى مكونات مهما كانت لأنه ببساطة فهم دماغهم ودلع كرشهم صح، هو ده «حمزة» أجمد مطعم فيكى يا مدينة نصر فى الافتكاسات، واللى ممكن ببساطة جدا تدب له مشوار مخصوص من محافظة تانية للقاهرة وفى الآخر تقول: «الأكل ده يستاهل السفر علشانه».

المطعم وراه أكيل وطباخ جامد جدا وهو المهندس «وائل» أو أبوحمزة زى ما بينادوا عليه، الراجل ده ببساطة كان بيحلم بمحل يحقق أحلام أى زبون فى أى تخصص، فبدأ بـ6 أمتار فى شارع عباس العقاد، وانتهى بمحل 500 متر على دورين قدام الحديقة الدولية كل متر فيهم بيحكى ألف قصة عن أكلات متتنسيش قدمها المطعم للزبائن.

أهم حاجة فى المحل نظافة الأكل كله، بيطبخ قدامك وأنت قاعد والعمال كلهم بيضحكوا فى وش الناس، فى البداية طلبنا بسمتى حمزة، وكنا حاطين آمال كبيرة أوى على الطبق ده من كتر الشعر اللى بيتقال عليه، وفعلا الطبق طلع تحفة راق من الأرز البسمتى الأصفر مرصوص عليه راق سوسيس وبسطرمة ولحمة مفرومة وزيتون وفلفل، وكل دول متغطيين بجبنة موتزاريلا سايحة على الوش وكاتمة فى قلبها كل الحلاوة والطعامة دى.

أشهر حاجة فى حمزة فطيرة النوتيلا بس لو مش قادر تطلب فطيرة كاملة منها عادى جدا أنك تقوله أنا عايز نص نوتيلا ونص فواكه أو ربع نوتيلا وربع فواكه وربع سكر وربع عسل، وأنت بقى عليك تدوق الأربع أصناف وبنفس سعر الفطيرة الواحدة دلع دلع يعنى مش أى كلام. الأسعار معقولة مقارنة بالأكل اللى بينزل لك، الفطائر بتبدأ من 22 لـ50 والبسمتى من 7 لـ38، أما الكريب فمن 13 لـ20، والمشويات من 15 لـ200 حسب الكمية والنوع طبعاً.

لو هتروح فى رمضان هتلاقى المنيو العادى شغال ولو رحت فى السحور هتلاقى وجبة حمزة حاجة كده فول مع بيض وزبادى بس أحلى حاجة فى الموضوع إن الفول هينزل لك من على عربية فول حقيقية مش كده وكده اشتراها المحل مخصوص لما عرف أن الزباين بيحبوا فول العربية أكثر من أى فول تانى وبرده بجودة وضمان حمزة.

نصيحة أخيرة، لو هتروح بالعربية اركن بعيد شوية ناحية الحديقة الدولية، وخد معاك كل صحابك وحبايبك هيشكروك أوى بعدها، وأحلى معاد للأوردر على الساعة 10 أو 11 بالليل كده بيكون الجو رايق والخدمة أفضل، وده لأن المطعم شغال 24 ساعة، وجرب وادعيلى.