"ويليز كيتشن"..برجر مطبوخ بهندسة اختراع السندوتش المتين

ميكس مظبوط من الهندسة.. الطبخ والتتبيلة الحلوة والمززة أوى، هو ده ببساطة «ويليز كيتشن» أجمد محل برجر فى مدينة نصر للأكيلة المحترفين، الوجهة الصح للى بيحبوا التجديد وبترفرف قلوبهم مع أول قضمة من برجر اللحمة الصافية مع الجبنة الموتزريلا والهالبينو الملفوف فى العيش المقلى فى الزيت، واللى جايبه من المكسيك مخصوص لمصر المهندس وائل الشرفا صاحب المحل والطباخ اللى هندس الأكل وطبخ بهندسة.

رحنا على السمعة الطيبة للمحل- رغم قصر عمره فى السوق- وأول ما طلبنا دخلنا بقلب جامد فى الـ«ويليز ناتشو برجر» اختراع يا كوتش، وأى اختراع، فى الساندوتش ده بيحطوا البيكون مع التشيلى صوص والجبنة الناتشو والبصل المكرمل والهالبينو الحار نار، وبعدما يستوى وكل محتوياته تفضل تدخل فى بعضها ينزل الساندوتش كله ياخد قلية بسيطة فى الزيت فتسيح الجبنة وياخد العيش طعم جبار أشبه بطعم عيش السمبوسة اللذيذ.

الأسعار غالية حبتين بس مقارنة مع محلات البرجر اللى بتقدم نفس الجودة والأنواع ولا حاجة، الساندوتشات بتبدأ من 30 لـ40 جنيها ومع الكومبو يوصل الطلب لـ60 جنيه مستريح بس يستاهل، الوجبة تشبع والبطاطس حكاية، بيعمولها بتتبيلة خاصة جداً من اختراع المهندس وائل بنفسه اللى بيعملها فى البيت من 12 نوعا مختلفا من التوابل وبمقادير معينة ويجيبها للمحل عشان يحافظ على الخلطة السرية. «الافتكاسات» كثيرة أوى بس أحلى حاجة بجد مينفعش متجربهاش المشروم المقلى ومحشى موتزريلا، وطبعاً ساندوتش «تشيز مادنس» وده مينفعش يتاكل فى أى حتة غير فى المحل نفسه عشان تلحق تاكل الجبنة اللى بتبقى أشبه بقاعدة بركانية كاملة تحت الساندوتش لما تبرد، وأحلى ما فى المحل التجديد فى كل حاجة حتى البيبسى بيحطوا عليه نكهات مختلفة زى الفانيليا والكريز والرمان وده بيخلى الطعم مختلف وأحلى مع الأكل. لو هتطلب فى رمضان يبقى استنى ساعة واحدة بس بعد الفطار واتمزج على الساعة 8 ببرجر مشوى على نار هادية بمزاج عالى وممكن كمان تطلب منهم الوجبة الرمضانية معاها سمبوسة باللحمة وكبيبة وقطايف بالجبنة وفرايز وواحد من المشروبات الرمضانية المميزة.

آخر نصيحة لو تقدر روح بعربيتك وكل وأنت فيها قدام المحل لأن القعدة فى المحل وقدامه صغيرة جدا ومش حتديك راحتك فى اللغوصة بس بوجه عام الأكل هناك مينفعش يتفوت، وجرب وادعيلى.