أشهر 5 نكت يعرفها المصريون.. "عندك حلاوة"؟

الشعب المصرى معروف بقوته وجبروته وخفة دمه طبعًا، فالكوميديا فى حياة المصريين روتين شبه يومى اعتادوا على استخدامه فى كلامهم ومزاحهم، لدرجة أن هناك نكت مصرية بعينها مرت على كل المصريين تقريبًا خاصة جيل الثمانينيات والتسعينيات.

اشتهرت تلك النكت لأسباب مختلفة إما لأنها عرضت فى برنامج شهير أو قالها نجم معروف وبقيت فى ذهن المصريين حتى الآن، وبالرغم من أنها "نكت قديمة" مثلما يصفها المصريون إلا أنك ستتعجب من كم من يضحكون عليها حتى الآن، ونرصد أشهر 5 نكت يعرفها المصريون:
1) الست تحب 4 حيوانات فى حياتها
الست تحب أربعة حيوانات فى حياتها 1- الثعلب علشان تحطه فرو على كتفها 2- التمساح علشان تعمله عربية تركبها 3-الثعبان علشان تعمله حذاء وشنطة 4- الحمار اللى حيجبلها كل ده
2) عند قطع رجل الضفدعة لا تسمع
اشتهرت هذه النكتة بعد سرد الفنان أحمد حلمى لها فى أحد البرامج، وتقول النكتة:
مرة عالم حب يعمل تجربة على ضفدعة قام قطع الرجل الأولى وقالها نطى فنطت، فكتب ملاحظة عند قطع الرجل الأولى للضفدعة تنط، فقطع الرجل الثانية وقالها نطى فنطت كتب نفس الملاحظة الأولى، وقطع الرجل الثالثة وقالها نطى، وبرده بلدينا كتب عند قطع الرجل الثالثة الضفدعة تنط، قطع الرجل الرابعة وقالها نطى منطتش فكتب عند قطع الرجل الرابعة تفقد الضفدعة حاسة السمع.
3) أنا مستنى القطر فى بيتكم
قيلت هذه النكتة فى أحد البرامج الرمضانية التى كانت تذاع يوميًا عشر نكت على المشاهدين وترتبهم حسب قدرة كل واحدة منهم على الضحك، وفى حلقة احتلت هذه النكتة الترتيب الأول ولم ينساها المصريون من وقتها، وتقول النكتة:
واحدة الدولاب عندها بيعمل صوت لما القطر بيعدى من جنبهم جابت نجار صلحه مرة واتنين وتالت مرة قالتله والله ما أنت ماشى إلا لما القطر يعدى وأشوفه هيتهز ولا لا.. شوية وجوزها جه والنجار من الخضة استخبى فى الدولاب.. لما جوزها شافه قاله وأنت بتعمل إيه هنا.. قاله النجار طبعًا لو حلفتلك بإيه مش هتصدق إنى مستنى القطر.
4) مرة واحد اتنين تلاتة
وهى النكتة التى لم يعلم المصريون حتى الآن سبب إطلاقها أو سبب تمسك البعض بها بحجة أنك ستقع على نفسك من الضحك عندما تسمعه يقول: مرة واحد اثنين ثلاثة.
5) عندك حلاوة ..أنا عايز جبنة
مرة واحد كل ما يعدى على البقال يقوله عندك جبنة؟ يقوله آه.. يرد عليه أنا عايز حلاوة
كل مرة يعدى عليه يقوله كدة.. فالبقال اتخنق فرد على أبو الواد وقاله ابنك كل مايشوفنى يقولى عندك جبنة أقوله آه يقولى طب إدينى حلاوة.. فقاله هقولك على حل حلو عندك عصاية ؟؟؟ قاله آه قاله إديلو بالقلم.