أنا: فرحان أوى مش عارف ليه
هو: إيه السبب؟
يمكن علشان حاسس إن حاجة حلوة فى حياتك بتستناها كل سنة قربت.
أنا: ابتسم
هو: ولا يمكن علشان ناس غالين عليك وهما كل حياتك.. إنك تشوفهم بقى قريب
أنا: ابتسم
هو: ولا يمكن.. ويمكن
طب إيه
عرفنى.. ليه السعادة اللى مالية عينيك دى؟
اللى شايفه عليك من أول ما شهر 12 بدأ.. امممم تلاقى الموضوع يخص الشهر ده..!!!
هو يعنى إيه شهر 12 بالنسبة ليك؟
أنا: ساكت ومبتسم
هو: آه شكلك فرحان إن السنة دى خلصت
وتلاقيك مستنى التانية وحاسس إن أحلامك اللى معملتهاش فى دى هتحققها فى السنة الجاية، والكلام الكبير الجميل اللى بيتقال ده.. على فكرة كل السنين زى بعض ومفيش حاجة مختلفة عموما.. ربنا يوفقك.
(عمال يقولى كل ده وأنا باصصله وساكت)
ولسان حالى بيقوله إدينى فرصة أرد عليك وأنا هقولك
لكن مستنية يخلص.. أصل ساعات لما بسمعه.. بسمع صوت أفكار الناس وهيا بتشوف الحدث.
كل واحد بيشوف من ناحية مختلفة مبيستناش يسمع للآخر..
لو استنى هيجيله الرد أو إجابة التساؤل من غير ما يتعب نفسه فى تكهنات كتير هتضيع عليه الوقت فى إنه يسمع الرد.
بس فى النهاية أنا مبسوط من الأفكار اللى بيقولها..
لأنه لما بيخلص الأفكار دى بتشغل بالى أوى
إنى أحاول أصلح الأفكار دى..
بس عارف مفيش أحلى من انك تكون بسيط زى ما انتا من غير تكلف
وفى النهاية لازم أقوله وأريحه
أنا: عارف إجابة سؤال أنا مبسوط ليه؟
علشان فى الشهر ده ربنا رزقنى إنه جمع شملى مع أجمل زوجة فى الدنيا.
وبحس إن الشهر كله ملكنا
كل عام وإنتى أقرب وأحب الناس إلى قلبى فى عيدنا وكل عام تكونين مصدر السعادة لنا بضحكاتك وكلماتك التى أسيرها لا يغيب عن أذنى أبدا.
صورة أرشيفية
لا توجد تعليقات على الخبر
تم أضافة تعليقك سوف يظهر بعد المراجعة