رئيس الزمالك: لن أسمح للمنتخبات بضم لاعبى الفريق دون جاهزيتهم

أكد رئيس نادى الزمالك، أنه لن يسمح مرة أخرى بإنضمام لاعبى فريقه لصفوف المنتخبات الوطنية، دون جاهزيتهم التامة سواء من الناحية البدنية أو النفسية، موضحاً أن المنتخبات تضم اللاعبين لاستهلاكهم.

وقال رئيس القلعة البيضاء، خلال تصريحات تليفونية لبرنامج "اللعبة الحلوة" الذى يقدمه خالد الغندور، عبر شاشة "ltc": "لو اتحاد الكرة وقف على نفوخه، مش هسمح للاعب ينضم للمنتخبات دون جاهزيته، والكلام اللي بيتعمل من اتحاد الكرة، وشغل البلطجة، وتقولى أصل ده منتخب بلدى، أنت النهاردة مش بتدينى مليم فى اللاعب، ده لما بيكون عليا جنيه لاتحاد الكرة بيوقفلى قيد اللاعب، طيب أنا بقى بدفع ملايين فى اللاعب، حضرتك بتدفع معايا، ولما بيتكسر عندك وأرجع أصرف أنا عليه هتدفع معايا".

وأوضح رئيس الزمالك، أن مصطفى فتحى ومحمود كهربا، تم استبعادهما من معسكر الفريق استعداداً لحرس الحدود، بسبب سؤء حالتهما النفسية والبدنية، لافتاً: "لما يبقى عندى كهربا خد موسم معايا متصل بدون راحة، هو كهربا ده مكنة، ولا مصطفى فتحى ورمضان صبحى دول مكن، فقصة أنك تاخد لاعب مستهلك وتخلص عليه، ده مش هيحصل، ولو هتقولى منتخب بلدى يبقى تاخد لاعب سليم، وترجعهولى سليم زى ماخدته".

وتابع: "بقولهم اتقوا ربنا، وده كلام نهائى، وأتخن واحد فى اتحاد الكرة يخبط دماغه فى الحيطة، ومن أقرب ترعة يروح يشرب منها".