محمد صبحى تعليقاً على تقديمه برنامجا: ترددت كثيراً خشية الوقوع فى الكذب

فى مقدمة نارية للفنان محمد صبحى شارحاً فيها أسباب تقديمه لبرنامج عبر فضائية الـ"سى بى سى" قال: إنه تردد كثيراً فى تقديم أى برامج تليفزيونية تجنباً للوقوع فيما وصفه بـ"الكذب"، وتابع: "كل ما تيجى الفكرة فى دماغى أنى أعمل برنامج أستغفر ربنا وأستعيذ بالله من الشيطان الرجيم وأدخل أصلى ركعتين.. مانا مش عاوز أرتكب ذنوب، برنامج وأطلع أكدب كمان لا.. بس أخيراً ومعرفش إذا كنت صح ولا غلط حسيت أن دا الوقت المناسب عشان أقدم فيه برنامج.

وأضاف "صبحى" خلال تقديم برنامجه الجديد "أعزائى المشاهدين مفيش مشكله"، قائلاً: "يمكن عشان حاجات كتير حصلت وبتحصل فى المجتمع وعندى كلمة فيها جايز تكون مفيدة، والكلمة دى يمكن مينفعش تتقال فى مسرحية أو مسلسل، يمكن عشان الفن والإعلام بيكملوا بعض كمحتوى وصناعة، يمكن عشان التغيرات بقت كتير، والإعلام أسرع فى الانتشار".

واستطرد صبحى إلى أنه لا يقدم البرنامج للمقابل المادى قائلاً: "مش عشان الفلوس زى ما ناس كتير فاهمين" وأضاف مازحاً: "قناة سى بى سى مبتدفعش زى ما الناس فاكرة، أصلهم مؤمنين قوى بالعمل التطوعى، دا ممكن يطلبوا منى ألملهم تبرعات، مضيفاً: "استعنت بالله، واعتمدت على أنى واخد زمان حقنة تطعيم ضد الكذب وقلت مش هعمل ولا هقول إلا اللى أنا مقتنع بيه".