البداية .. منك أنتى
والنهاية .. فيكى أنتى
كل كلمة فوق لسانى
طالعه بتقولك حبيبتى
الخطاوى .. رايحه عندك
والغناوى .. حتّه منك
كل شىء مرسوم بصورتك
ياللى جوّه الروح سكنتى
قد إيه .. محتاج أضُمّك
قد إيه .. مشتاق لحضنك
قلبى فتّح لما حَبك
شاف بنات الخلق .. إنتى
مش غريبة لما اسافر
بين عيونك ليل نهار
مش غريبة أبقى نجمة
ف السما وأنتى المدار
مش غريبة جيشى يعلن
انهزامه ف الحصار
لمّا حُبك جه حاصرنى
الخضوع كان اختيار
التوحّد تم بنّا
مستحيل يبقى انشطار
بس قولى واخده قلبى
جنّه والا ..
قلبى بعد الحب ممكن
يلتقى ف هواكى نار ؟
البداية .. لون سمارك
اللى كان ف القلب عنبر
والنهاية .. قلبى جالك
حُب خلّى الدنيا سكر
صُبّى كاس العشق خلّى
قلبى من أشواقه يسكر
وامّا قلبى يقول كفايه
يا حبيبتى .. زيدى أكتر
واوعى مرّه تغيبى عنّى
مهما تتغيّر مشاعرك
إوعى تنسى أن قلبى
مهما غيبتى برضه فاكرك
وان صورتك ..
جوّه جوّه القلب ساكنه
مهما روحتى والا غيبتى
د البداية .. منك أنتى
والنهاية .. فيكى أنتى
كل كلمة فوق لسانى
طالعه بتقولك : حبيبتى
حبيبان - أرشيفية
لا توجد تعليقات على الخبر
تم أضافة تعليقك سوف يظهر بعد المراجعة