وانتشرت التدوينة بشكل كبير تزامنا مع زيارة النجم العالمى مورجان فريمان لمصر لتصوير فيلمه الجديد، التى لم تستغل فى الترويج للسياحة فى مصر، وكانت التدوينه المتداولة تقول "ليه مصر للطيران متقدمش رحلات رخيصة زى فلاى دبى من غير أكل ولا شرب وليك هاندباج سبعة كيلو كنوع من أنواع تشجيع السياحة.. ليه فنادق شرم الشيخ والغردقة متعملش خصومات كبيرة على موقع بوكينج كنوع من أنواع تشجيع السياحة بدل ما هم بينشوا.. ليه منعملش تليفريك بين الأهرامات وأبو الهول والسياح تشوف الهرم من زاوية عالية كنوع من أنواع تشجيع السياحة.. ليه منعملش فوق البلو هول سكاى دايف وتنزل بيك تحت المياه كنوع من أنواع تشجيع السياحة.. ليه منعملش حملات ترويجية لـ coloured canyon and white canyonكنوع من أنواع تشجيع السياحة.. ليه منعملش فيرى بوت من جدة لمصر الناس تخلص العمرة وتيجى تتفسح فى مصر وعلى فكرة فى دول بتعرض باكيدج العمرة معاها السفر لمصر زى إندونيسيا كنوع من أنواع تشجيع السياحة".
وتابع المشاركون تدوينتهم: "ليه منعملش بانجى جامب من فوق برج القاهرة كنوع من أنواع تشجيع السياحة.. ليه منعملش مهرجان سياحة وتسوق بجد وكل شركات السياحة تعمل عروض وتخفيضات والإعلام يركز عالترويج للسياحة الداخلية اللى بدورها هتحرك الركود.. ليه مانديش كل سائح يوصل المطار تذكرة دخول منطقة الإهرامات ببلاش، والتذكرة يكون عليها إعلانات للمحلات والمطاعم والفنادق اللى حوالين الهرم وتكون الإعلانات مدفوعة الثمن من المعلن فبالتالى التذكرة حتجيب تمنها للدولة والسائح هيروح يشترى من بازار ولا هيركب جمل ولا هيدخل الهرم من جوا وكله بيشغل كله.. ليه منعملش أكبر متحف مفتوح فى العالم أمام الأهرامات وأبو الهول ويتم الترويج ليه عالميا ووضع الآثار الخفيفة اللى سهل نقلها فى صناديق العرض الزجاجى اللى بنشوفه فى المتاحف ونحط كم كبير من الآثار بالتدرج التاريخى للأسر الفرعونية ونسميه متحف تاريخ مصر أو أى اسم يليق بالمكانة التاريخية، السائح يمشى بين الآثار ويشوف التطور التاريخى للحضارة الفرعونية وهو فى حضن الأهرامات.. ليه منعملش الأتوبيس الدورين المفتوح فى القاهرة ويكون مزين بصور الحضارات المصرية المختلفة وياخد السياح فى جولة داخل القاهرة أو حتى من الأهرامات لهرم سقارة والتيكت بتاعته تتحجز أونلاين.. ليه منعملش رحلات سفارى بجانب بحيرة ناصر والسياح يشوفوا التماسيح العملاقة الموجودة هناك.. أفكار كتير موجودة وعندنا خير مش عارفين نستغله وإمارة زى دبى بقوا يجيلهم سياح من كل العالم عشان يشوفوا الإبهار المصطنع فى دبى".
