مها حسين، صاحبة الـ26 عامًا، والتى تعتبر أول بنت مصرية محجبة تحصل على شهادة الغطس المتقدم، والتى تسمح لها بالغطس إلى مسافة بين 30 و35 مترًا تحت الماء، ضمن حملة "تحطيم القوالب النمطية"، التى أنشأ مستخدمو "الفيس بوك" لها "الهاشتاج" العالمى BreakingStereotypes"، الذى شهد مئات المشاركات لتحطيم القوالب النمطية التى يضع البشر بعضهم فيها دون أسباب منطقية.
تقول مها "بدأت أغطس فى مايو 2013 ولحد دلوقتى غطست حوالى 32 مرة، معظمهم فى دهب وشرم الشيخ، والرخصة اللى معايا هى مرحلة انتقالية لرخصة الإنقاذ والإسعافات، وبعدها رخصة التدريب والغطس بالمجموعات".
تعود بالقصة إلى البداية: الموضوع بدأ بسفرية عادية جدا لدهب، وهناك بدأت فكرة الغطس تشدنى، ولما جربت اكتشفت أن فى عالم تانى إحنا مانعرفش عنه حاجة، وإنك ممكن فى لحظة ترمى كل همومك وكل حاجة تعباك فى العالم ده وتنسى الدنيا فى سعادة ملهاش مثال، ومن وقتها الغطس بالنسبالى بقى شبه الإدمان".
تتابع "كانت دايمًا التعليقات أن أول مرة نشوف بنت محجبة بتغطس بالجرأة دى، وبعد وقت الموضوع بالنسبالى أصبح تحدى إنى أعمل الحاجة اللى بحبها وبالشكل اللى بحبه، وفعلا بقيت أول بنت محجبة تاخد شهادة الغطس المتقدم".
"الغطس غير حياتى كلها" تقولها بنبرة واضحة وتتابع "مش بس حياتى، لكن بعد ما بدأت أدون عن الرحلات والغطس بدأت بنات كتير تتشد لى، وبدأوا يكلمونى ويقولولى إحنا هنغطس أو يسألوا فين ممكن يعملوا كده، وده خلا ناس كتير تبطل تبص على الظاهر والحاجات السطحية زى إنهم يشوفوا لبس الغطس عيب، وينسوا إحنا إزاى بنكتشف خلق ربنا".
مها حسين مع مدرب الغطس مصطفى شعبان
مع الأصدقاء فى ذهب
مها حسين تصور نفسها سيلفى أثناء غطسها فى دهب
مها حسين تتحدث من تحت الماء
