إبراهيم الكهربائى بيحل مشكلة قطع النور بمولدات كهرباء "ديلفيرى"

فى الأمثال يقولون "اللى يعيش ياما يشوف" فلا يمكن حصر كم الأفكار والحلول التى يقدمها المصريون طوال الوقت لحل أى مشكلة تقف عائق فى طريقهم، و"الكهرباء" من المشكلات التى تتصدر المشهد الآن وخصوصا مع قدوم شهر رمضان، ولذلك قرر "إبراهيم"، كهربائى، أن يقدم حلا لم يخطر على بال أحد كما يقول، ويكون بديلا للمصريين عن وعود الحكومة التى لا تنتهى بخصوص حل الأزمة.

الأسطى إبراهيم الكهربائى يحكى لـ"اليوم السابع" عن طريقته الخاصة لحل أزمة الكهرباء قائلا: "الناس بتعانى من قطع النور ليل ونهار ومفيش حل خالص من الحكومة كل شوية يتقال إن الحكومة هتحل ومفيش حاجة بتحصل وعشان أنا كهربائى فقررت أدور على حل لأهلى وأصحابى وكل المتضررين، وعملت إعلان أنى مستعد أوصل الكهرباء للمنازل زيها زى وصلة الدش بالضبط، يعنى اللى عايز ينور بيته وقت ما النور يقطع يشوف هو عايز يشغل كام "لمبة"، بس لازم تكون موفرة ويجيلى المكان بتاعى وأعمله وصلة وده بيكون باشتراك شهرى 30 جنيه، عن طريق مولدات الكهرباء اللى عندى لأن مش كل الناس تقدر تشتريها، واللى عايز يشغل تلفزيون أو ريسيفر أو أى جهاز تانى مقابل خمسة جنيه فى اليوم".

ويضيف: "أنا معايا تالتة ابتدائى بس بيقولوا عليا دماغى حلوة عشان كده قدرت أعمل كمان جهاز أتحكم فيه فى الكهرباء اللى الزبون بياخدها واعرف إذا كان بيسرقنى ولا لأ، ولو عرفت أنه شغل حاجة غير اللى احنا متفقين عليها هقطع عنه النور وكمان هدفعه غرامة، ديه فكرة نفسى الحكومة تساعدنى فيها وتنتشر فى كل المحافظات لحد ما الحكومة تقدر توفر الكهرباء".