محمد منير يكتب : مسروق بن مسروق .."المشاركة الوطنية"

خلص الشيخ عبد الموجود تواشيح بداية قعدة النميمة الشرعية بعد الفطار، ولاحظت وجها جديدا فى القعدة، سألت السالك عنه فهمس لى: «اهمد ده بتاع الحى اللى مسؤول عن أسفلت الشارع اللى شغال دلوقتى عازمه المعلم الأرناؤطى على نميمية النهاردة»، أدركت بخبرتى كمسروق إن فيه مصلحة دايرة.

دخل المعلم الأرناؤطى القعدة متجها إلى الزبون الجديد، فاتحاً ذراعيه على مصراعيهما، هاتفا «إيه النور ده ياهندزة، والله الحتة من غيرك دلمه».. بادل موظف الحى الأرناؤطى الأحضان وكلمات مقتضبة بها خجل بلدى مصطنع.. وبدأت القعدة بسؤال الأرناؤطى: «عاملين إيه فى الأيام اللى مش باين لها لون دى» رد مهندس التنظيم «والله يا معلم البلد دى مظلومة لا عارفة تلاقيها من الإخوان اللى باعوا البلد لحماس ولا من الفلول اللى كانوا ناهبينها، والمصالح كلها متعطلة يا معلم».

رد الأرناؤطى: «تتعطل إزى ياهندزة طول ما البلد فيها ناس وتنية زيك»، وغمز له وقاله: «المصالح ما تعطلش إلا عند الكاوركات». دخلت ف الحوار بعد أن دققت النظر فى وجه موظف الحى وسألته بكلمات فطرية «هو مش أنت اللى كنت معايا فى الكلابشات ف النيابة وكانت قضيتك رشوة».. لم أشعر إلا بمتتالية من الأيدى على قفايا غلبت سرعتها سرعة إيد الصول بلال، وصرخ الأرناؤطى «غور يابن العبيطة».

ونظر لموظف الحى وقال: «اكسيوز مى ياهندزة»، رد الموظف: «اعذره يا معلم ماكنش يعرف إنها تلفيقة من النظام عشان كنا بنكلها بشرف ورفضنا الفساد، والحمد لله النظام الجديد خرجنا م السجن وكرمنا، رد الأرناؤطى: «تبعاً تبعاً طول عمرك جوهرة، نخش فى الموضوع البلدورة اللى انتم بترصوها بعد الأسفلت عشان تعملوا الرصيف خانقة على محلى والرصيف ضيق عايزين نوسعها».

رد الموظف: «مش ممكن آخد من عرض الشارع يا معلم»، رد المعلم: «وتاخد من عرض الشارع ليه زق الرصيف اللى قصادى اللى فيه بيت الواد مسروق ويفضل عرض الشارع»، رد الموظف.. «استبينا يا معلم بس دى تتكلف 3000 جنيه»، قال حنتيره: «وماله».. ونده عليا: «خد ياد يا مسروق روح بيتكم وهات 1500 جنيه حصتك فـ«الرصيف».

صرخت: «وأنا مالى يا معلم ده حيوسع عليك ويضيق عليا»، رد: يوسع إيه ويضيق إيه يا مغفل انت عايزة الدولة وهى بتبنى نفسها بعد الثورة تديك كل حاجة، هى عايزه بس مش قادرة يا جعر.. روحت البيت وبعت النحاس ودبرت الـ1500 جنيه، وقلت فى عقل بالى: «قضا أحسن من قضا وكل عام وانتم بخير».