"أم رحمة".. عمدة موقف تكاتك وصاحبة أحلى كوباية شاى

تقف يوميا وسط أكثر من 100 رجل، تسمع الشكاوى وتحل المشاكل وتساعد الجميع، لذلك يعرفها الكبير والصغير فى منطقة بولاق.

"أم رحمة" بمثابة عمدة موقف تكاتك بولاق، وهى كذلك صاحبة أحلى كوب شاى يتذوقه سائقى التكاتك والمارة كما تقول: "الكل بييجى عندى عشان يضبطوا دماغهم بكوباية الشاى بالنعناع، ويشتكوا لى من مشاكل الشغل والزبائن واللى له حق بعرف أجيبهوله لأن الكل بيحترمنى وبيسمع كلمتى عشان كده بيقولوا عليا عمدة الموقف".

"أم رحمة" عرفت طريقها لموقف التكاتك حين انفصلت عن زوجها وكان عليها أن تعيل نفسها وبناتها: "خرجت للشارع وأنا مش عارفة هعمل إيه لحد ما فكرت أعمل نصبة "شاى وقهوة للسواقين".

تضيف "أم رحمة": "عندى بنتين والأيد قصيرة، عشان كده قررت أسيب لهم تركة حلال، وهى الصيت الحسن، والسيرة الطيبة بين الناس لأنى مهما حاولت أن أسيب لهم فلوس، مش هيبقى زى السمعة الطيبة والجدعنة وشهادة الحق ".

تعافر "أم رحمة" مع الحياة حتى تحقق أحلام بناتها.. "حلم بناتى يبقوا دكاترة أنا عارفة أنى مش ها قدر على مصاريف التعليم، لكن سيباهم يحلموا يمكن، ربنا يكتبها لواحدة فيهم ربنا كبير، وعارف أنى تعبت فى حياتى وشقيت كتير، كنت بقول الناس المتعلمة عملت ثورة علشان حق الغلابة يرجع، لكن حق الغلابة عند ربنا".