"عم محمود" يصنّع أكبر فوانيس فى مصر

على مقعد صغير يستقر يوميًا لمدة تزيد عن 10 ساعات ينتهى من عمله ليبدأ بعدها فى وضع بضاعته على الأرفف استعدادًا لاستقبال الزبائن.. عم محمود الشريف أحد أشهر باعة الفوانيس فى منطقة الدقى، دائمًا له بصمته الخاصة التى تجله فوانيسه مختلفة، حتى لو تشابهت مع منتجات غيره من التجار.

ينتهى من صناعة الفانوس الأكبر صاحب لقب "الكبير قوى"، يضحك قبل أن يبدأ حديثه عن أكبر فانوس "أنا أول مرة فى حياتى أعمل فانوس كانت من 20 سنة تقريبًا، كنت شغال فى ورشة تحت الربع، وكان كل حلمى أنى أعمل أكبر فانوس فى مصر، وفعلاً بقالى أكثر من أربع سنين بنفذ التصميم ده، والحمد لله الناس بتجيلى من كل مكان تطلبه".

وتابع، "أنا عملت فانوس طوله حوالى 2 متر، وبنفذ منه أكثر من 30 واحد فى الموسم، وأصحاب المحلات الكبيرة وكمان الفنادق بيطلبوه مخصوص، وكمان الناس العادية، وعايز السنة الجاية أخليه 3 متر، وربنا معين".