استقرار فى أسعار ياميش رمضان.. والباعة يؤكدون: غالى رخيص الناس بتشترى

لا تخلو مائدة فى شهر رمضان من هذه الأشياء المكلفة بأن ترطب فم الصائم وتنزل عليه بردا وسلاما، لذلك يكون الإقبال عليها أكبر بكثير فى رمضان أكثر من أى وقت عادى، وفى جولة لـ"اليوم السابع" فى حى الدقى أظهرت مؤشرات الأسعار كما قال البائعون إلى انخفاض طفيف تشهده هذه المنتجات عن العام الماضى.

شريف الشرنوبى صاحب أحد المحلات فى منطقة الدقى يقول: "أسعار الياميش السنة دية أقل سعرا من العام الماضى ويتراوح الانخفاض ما بين جنيه واثنين، بس ده طبعا بيفرح الناس يعنى البلح العادى أسعاره بتبدأ من 6 جنيه وبتوصل لحد عشرين جنيه على حسب النوع أما البلح المجفف فسعره بيوصل لـ13 ده أقل سعر فيه، أما المشمشية فالكيلو وصل السنة ديه 42 جنيه وهى ديه الحاجة الوحيدة اللى ارتفع سعرها، لكن الخروب فأفضل أنواعه بيوصل لـ20 جنيه، أما المكسرات بقى فأسعارها زى ما هى يعنى البندق المقشر سعره 95 جنيه وعين الجمل 110 واللوز المقشر 85 جنيه".

تقول إحسان الشريف ربة منزل: "الياميش ده غالى حتى لو سعره نزل جنيه أو اتنين يعنى القمر الدين وصل سعره السنة ديه اللفة الواحدة بـ"27" جنيه والتمر الهندى بقى بـ8 جنيه بس هنعمل ايه كده كده لازم نشترى بس الحكومة تاخد بالها بقى أن كده مش هينفع نعيش عشان الأسعار غالية بالشكل ده".