يحكى لنا المعلم "رضا صابر" أحد كبار معلمى المذبح عن فكرة تكوين حملة انتخابية ودعائية للمشير السيسى خاصة بأهالى المذبح والسيدة زينب، "خوفنا شبابنا يتأثر بأى تفكير تانى ويتلعب بعقولهم باسم الثورة، ويتوهوا وميبقوش عارفين إيه الأصلح لهم وللبلد كلها، فقررنا نكون لجنة من كبار معلمى المدبح لتوعية الشباب فى البداية، ومع الوقت بدأ الموضوع يكبر بمشاركة الشباب واتحول لحملة انتخابية كاملة للسيسى".
"رجالة المذبح ورا السيسى ومش هنرتاح ولا يهدى لنا بال غير لما نشوفه قاعد على الكرسى"، هكذا عبر المعلم "فتحى التحش" كبير عائلة "التحش" وأحد القائمين على تنظيم الحملة عن موقفه وموقف أهالى منطقة المذبح بالإجماع على تأيد المشير السيسى على حد تعبيره.
ويخبرنا "التحش" عن تفاصيل الحملة قائلا، "إحنا متابعين حملة السيسى وشايفين قد إيه الشعب كله مؤيده ومعاه، وإحنا علشان بنحبه وراضين عن كل خطوة بيعملها، قررنا نقوم له حملة انتخابية خاصة بنا، تكون على مستوى منطقة السيدة زينب بالكامل، لأننا عارفين قد أيه المنطقة دى مهمة ومؤثرة على المناطق المحيطة بها، وان أعداد أصوتنا مؤثرة على ميل الكافة لصالح السيسى".
وعن شعارهم "حط صورة على صورة" يقول، "مفيش حملة انتخابية قوية من غير دعاية أقوى ده اللى اتعلمناه طول السنين اللى فاتت من انتخابات مجلس الشعب وانتخابات الرياسة اللى مرينا بها، علشان كده قررنا تقسيم نفسنا لفرق كل فرقة يرئسها عائلة تتكفل بمصاريف طباعة الصور واللافتات وتوزيعها، والنتيجة كانت بفضل الله ماسبناش حتة فى المدبح أو فى السيدة زينب كلها والمناطق المحيطة إلا وعلقنا فيها الصور ووعينا أهاليها بالتصويت للسيسى علشان مصلحتهم ومصلحتنا ومصلحة مصر كلها".
