ووجه الكثير من الشباب مجموعة من للدفعة الجديدة من طلاب الجامعة بشكل عام، ولطلاب الطب بشكل خاص، الذين كان لهم نصيب الأسد من النصائح الساخرة التى تداولها الشباب ومنها "نصائح لدفعة طب الجديدة عارف البالطو الأبيض اللى بتبقى فرحان بيه دا؟ أبوس إيدك ما تتصورش بيه.. هاتكره نفسك بعد كدا لما تشوف الصور دى"، و"داخل طب؟؟ ودّع أصحابك يا لمبى"، و"نصيحة.. إوعى تتصور مع هيكل عظمى، وإن كنت مضطراً فبلاش بلاش تلبسه بالطو الطب"، وكذلك "فى امتحان الشفوى.. مش مهم تحل.. المهم تظبط الزبون.. إنك تخرج والدكتور سعيد حتى لو ما اتكلمتوش فى الطب" و"لو داخل الكلية دى عشان فلوس مابقيتش بتجيب فلوس، ولو عشان برستيج مابقيتش برستيج، ولو عشان الخمسة عين بتاعة الدكتور فالخمسة راحوا، ولو عشان بتحبها فكر تانى"، و"هتدخل الكلية حلمك تكون مجدى يعقوب.. هتتخرج منها دكتور ربيع بتاع المزاريطة".
فيما وجه إليهم البعض نصائح جادة منها "أنت هتكون فى النهاية إنسان مش طبيب، هتكون "إنسان كامل" وظيفته "طبيب"، علشان كده أوعى تنسى الحاجات التانية المهمة فى الحياة، أوعى تنسى صحتك.. أوعى تنسى عيلتك.. أوعى تنسى أصحابك".
أما النصائح التى تداولها الشباب لطلبة الجامعة بشكل عام منها "جملة أنتوا أسوأ دفعة عدت عليا" دى لازم تسمعها علشان تدخل سنة تانية"، "النصايح اللى هتاخدها من واحد شايل مواد هتستفيد منها أكتر من نصايح أول دفعة"، و"اقعد فى آخر بنش جنب الباب اللى ورا لو المحاضرة عجبتك خد كتبك واتنقل قدام.. ولو ماعجبتكش خد كتبك واطلع براحه من الباب"، "الكشكول تجيبه بسلك غلاف تقيل عشان ده مش للحضور ده للفرشة على الرصيف أو الحاجز من الشمس وأنت ماشى، هات حاجه تستحمل".
وحذرهم آخرون "إن كنت فاكر وأنت فى ثانوية عامة إنك فى عنق الزجاجة، أعرف أنك هاتبقى فى الشاليمو فى أولى جامعة"، و"أول ما توصل لمرحلة إنك تقول هعوض الترم التانى والميدتيرم فاعلم إنك على مشارف الفشل"، و"فى ناس كده هيجوا يقولولك إحنا هنسقط وهنشيل وما بنذاكرش أعرف أن دول هيطلعوا الأوائل".
أما البنات، فكان لهم نصيب خاص من النصائح أبرزها "ما تحطوش عنيكو على دفعة رابعة وأنتوا طالعين، كُلهم مرتبطين من قبل ما تدخلوها"، و"المكياج العبقرى والألوانات العظيمة دى ملهاش أى لازمة فى الجامعة، إنتى مش رايحة مولد يا بنت الناس"، وأيضًا "المكياج الكامل، الكعب العالى.. والكلية دونت ميكس".
