قلة الشغل.. جعلت محمد يبيع "جيلاتى" على عربية "محمود حماصة"

عربة صغيرة مكونة من ثلاثة عجلات يتقدمها صندوق من الأمام ويقع خلفه مقعد صاحبها، وقف إلى جانبها شاب تجاوز الـ24 من عمره، تاركا عليها بعض الرسوم والكتابات لتعبر عن سلعته، "جيلاتى محمود حماصة" هو الشعار الذى كتب على العربة جذابا معه أنظار المارة الذين نسوا هذه المهنة التى شارفت على الانقراض.

"محمد" الشاب الذى وقف يبيع الأيس كريم أو "الجيلاتى" كما كتب على العربة، يقول لـ"اليوم السابع": "العربية دى بتاعت أبويا، كان بيشتغل عليها زمان أيام ما كانت الناس بتشترى جيلاتى من العربيات اللى بتسرح فى الشارع، بس لما كبر بطل يسرح عليها، وركنها فى البيت".

"أنا لو كنت لقيت شغل مكنتش هطلع بالعربية دى، بس أعمل إيه الحال مريح، فقولت اشتغل فى الكار اللى أفهم فيه"، هكذا برر محمد خروجه لبيع الجيلاتى رغم أنها مهنة قاربت على الانقراض، حيث يشير إلى أن عربة الجيلاتى تعتبر من الأشياء التى اختفت فى العصر الحالى، نتيجة ظهور الأيس كريم المغلف الموجود بالمحلات، بالإضافة إلى المحلات المتخصصة فى صناعة الأيس كريم، "زمان مكنش فى حد بيبع جلاتى غير على العربيات، لكن دلوقتى فى كل حتة وفى أى سوبر ماركت هتلاقى هناك اللى أنت عاوزه".

أما عن المناطق التى يذهب إليها محمد يقول "أنا بروح المناطق الشعبية اللى ممكن ألاقى فيها طلب من الناس والعيال الصغيرة، لكن فى بعض المناطق الناس بتخاف تشترى حاجة مكشوفة، وبيشتروا حاجات مغلفة، مع أن العيال الصغيرة بتحب شكل العربية، وساعات بيمشوا ورايا".

الأسعار لا تختلف كثير عن أسعار الأيس كريم العادى، حيث يبلغ ثمن البسكوتة عند محمد 2 جنيه، أما العلبة فيبلغ ثمنها جنيه ونصف كما يقول محمد، كما أنه ليده العديد من النكهات المختلفة مثل الفانيليا والشيكولاتة.