لو هتتعلم لغة تبقى لا إنجليزى ولا فرنساوى؟ محمد بيقولك "اتعلم نوبى"

فوق ألسنة جيله تقف الزفرة الأخيرة للغة بلاد الذهب المصرية بعد رحلة هجرة انتقلت بجدوده من أعلى ضفاف النيل فى النوبة نحو أرض المحروسة الواسعة ليتفرقوا، وتتفرق معهم لغة حاولوا التشبث بكلماتها الساحرة من جيل للآخر جذبته الحياة لتعلم حروف اللغة العربية ليتفاهم مع أهل أم الدنيا، والبحث عن اللغة الإنجليزية والفرنسية وغيرهم فى رحلة الوصول لعمل أفضل، لتستقر لغتهم حبيسة حوائط المنازل فوق ألسنه الجدود يحاولون التعلق بها فى مواجهه سرعة حياة أخرجت أخيرا أجيال لا تعرف حتى أبسط كلماتها، مشهد يمر أمامه قبل عامين رفع بعده شعار واحد "كلمنى نوبى" وبدأ رحلة لحفظ اللغة النوبية.

25 عامًا هى عمر محمد عبد الباسط، وأغلبهم كان بالكاد يستطيع فهم لغته الأصلية دون حتى أن يستطيع نطقها بالشكل الصحيح، تبدوا على ملامحه الجدية حين يقول "ده مش حالى لوحدى، ده حال معظم جيلنا اللى هاجر جدوده من النوبة مع بناء السد العالى والأحداث المختلفة للقاهرة، ولباقى مدن مصر، بس المشكلة الحقيقية مش فينا أحنا على الأقل بنقدر نفهم، لكن الأجيال اللى طالعة حتى مش بتقدر تفهم اللغة ولا تعرف حاجة عنها، وهنا فعلا المشكلة الحقيقية".

محمد بدأ منذ عامين كطالب يتعلم اللغة النوبية فى جمعية نوبة الخير وفريق نوبيا تيم اللذان كانا يحاولان المحافظة على اللغة النوبية قدر المستطاع، وبسرعة تطورت الأمور ويقول "الموضوع بقى هو محرك حياتى الرئيسى وهدفى الأهم فى الحياة أنى أحافظ على اللغة، وبدأت أتواصل مع الجمعيات النوبية وحتى فى نوبة الخير وفريق نوبيا تيم بقيت المسئول عن مشروعاتهم لتعليم اللغة النوبية بشعار كبير.. كلمنى نوبى".

ويتابع محمد "الأهم كان أننا نعرف نوصل اللغة دى للشباب البعيد عن النوبة، وحتى للمصريين اللى اللغة النوبية هى جزء منهم، وهنا اتجهت للثروة الغنائية الضخمة لأهل النوبة، لأنها ببساطة أكثر حاجة بيحبها الشباب، بدأنا نترجمها ونترجم معانيها الكبيرة باللغة العربية، ونشتغل على تعليم اللغة من خلال الأغانى، وكان جزءا كبيرا من ده على الفيس بوك، والمجموعة بتاعتنا لتعليم اللغة وصلت أكثر من 11 ألف فيهم مش نوبيين، لكن بيحبوا منير مثلا وبيحاولوا يعرفوا معانى أغانيه ويحفظوها ومن هنا بنعلمهم اللغة، وعممت ده فى الكورسات وبدأ فعلا الشباب ينجذبوا ويتعلموا أكثر، والأطفال والأجيال الجديدة هى كمان".

سر محمد كان فى جدوده وكلماتهم التى لا تخرج من أذنه "كانوا بيقولوا لينا أن اللغة هى زفرة النوبة الأخيرة اللى لو راحت هتروح النوبة، هى الحاجة اللى باقية لينا من النوبة وأحنا بعيد عنها".

يكمل حديثه بفخر "لغة النوبة كانت هى لغة سلاح الإشارة فى حرب أكتوبر، وهى اللى وقف قدامها اليهود وما قدروش يوصلوا لمعانيها، وكانت بالنسبة ليهم طلاسم، وحتى شفرة النصر فى الحرب اتقالت بالنوبى، وده اللى خلى جامعات كثير فى العالم تاخد بالها منها، ودلوقتى بتدرس فى كندا وألمانيا لكن بتضيع من مصر، ومن سكان النوبة الأصليين".