حزب الإنسانجية.. وحقوق الإنسان الحقيقية

بعد أن لم يستطع عامة الشعب المصرى- الذى مازال ظريفا – برغم كل الجارى- أن يستوعب الأحزاب الجديدة فى سوق الجمع السياسية، لكنه أطلق اسما مناسبا على حزب جديد هو حزب "الإنسانجية" الذى يدافع عن ما يسمى حقوق الإنسان المكتوبة فى دفتر أحوال العم سام حتى لو خربت مصر عاليها فى واطيها لصالح إسرائيل، تذكرت أرجوزة كتبتها للأطفال بما فى ذلك الأطفال داخلنا نحن الكبار، وقلت أنشرها لعل "الإنسانجية" يتقون الله فى أطفالنا لو سمحوا، بعد إذن الولايات المتحدة العبرية.
(1)
حقى أنا بحق وحقيق:
إنى خلقة ربــِّـنا
يبقى مش حقى أفرط فى اللى خلانى: "أنــا"
بس ده مش حقى وحدى
ما هو عندك زى عندى
(2)
حق كل الناسْ يا ناسْ
هوّا حقـِّى
إنْ ظلمتكْ أبقى انا ظالمْ لـِنـَفسِى
هكذا نبـِّهنى حـِسِّى
يعنى عقلى التانى لاَخـْضـَـرْ
مش بعقلى الكمبيوتر: يجمع اكتر،
(واللى يغلب: يبقى أشطرْ،
واللى جاله الكومى هوّا اللى يبـصّرْ)
(3)
آنا حقى، وانتَ برضهْ مِثلِى خالصْ
إنى أكون وياكْ وفاهمْ "إنت مينْ"
وانت برضو تكون شايفـْنِى وانت باصصْ
فى حقيقتى مالشمال وٍمْنِ اليمين
(4)
حقى إنى أعيشْ كما شاءْ ربـِّنا
يعنى أعيش ضعفى معانا كلنا
ألتقينى بقيت "قوى" بيكم: "أنــــا"
ناخده غصبـِنْ عنّهمْ،
مش حانشحـَتْ حقنا
أى ظالم مش حايستجرى يقرّب منـِّنَا
طول ما إحنا مصحصين مع بعضنا
(5)
أنا حقى أكون يا خويا محترمْ
مش بإنى أبقى مشدودْ واترسِمْ
أو بإنى أبقى ذوق قوى وابتسِمْ
لأ بإنى أقدر اتشعـْطر، وأرجع أنسجمْ
يعنى أسيب نفسى، ولكن، أرجع أتْلـَمْلـِمْ، والـِمّ
قصدى: نطّ، وفطّ، ومحاوله، وْغلط، فرْح، وألـمْ
طالما ربى خلقنى بكل ده: يا دى الكرمْ !!!
ربنا أكرمنى إنساناً، و"علّم بالقلم"
يبقى أنا فى كل أحوالى دهه: برضه لسه محترم!!

(6)
حقى كل ما أخلـّـص أنى أبتدى
حقى إنى لمّا أغلط: أهتدى
(7)
آنا حقى آخد الفرصة وأعبّـرْ
آنا حقى أعيد نظر وأرجع أفكرْ
(8)
فهمى "أسباب ما حصل"، يمكن يفيد
بس يفضل حقى: أبدأ من جديد
(9)
حقى إنى أكون بنى آدم، وبسْ
حقى إنى زى ما بافكّـر: أحسّ
(10)
حقى إن يكون صحيح أنا ليّا حقْ
مش هبه من حدّ، أو حتـِّةْ ورقْ