أبو أحمد.. "هوايته ينظف الشارع كل يوم الصبح عشان يشتغل على نضافة"

4 شارع شهاب أصبح علامة مميزة بفضل محمد أبو زيد الشهير بـ "أبو أحمد"، صاحب فرشة العبايات الكائنة فى هذا العنوان، لقيام الرجل الستينى بشراء صفائح قمامة بطول الشارع وفى شارع جامعة الدول أيضاً كتب عليها "كن نظيفا" وبتوقيع "أبو أحمد 4 شارع شهاب".

يتذكر باليوم والشهر والسنة التى فرش فيها عباياته لأول مرة على رصيف شارع شهاب أمام العقار رقم 4 "من يوم 3 أغسطس 1990 وأنا قاعد هنا قدام فرشتى وبعمل صفايح للزبالة وتتسرق وأعمل تانى، وآخر حاجة عملتها صفائح متثبتة فى الأرض عشان محدش يسرقها بطول شارع شهاب، واخترت اللون الأصفر عشان ربنا وصفه فى القرآن بأنه يسر الناظرين وفى آخر رمضان ربنا كرمنى بقرشين زيادة فعملت 20 سلة صغيرة فى شارع جامعة الدول و4 صفائح كبار."

لا ينتظر الرجل الستينى شيئا مقابل مجهوداته ولكنه يوقع باسم شهرته ومكان فرشته على الرصيف لسبب فى نفسه وهو "عشان الناس لما تيجى تشوفنى تعرف إن اللى عملها راجل غلبان ويعملوا زيى ومش مستنى حاجة من وراها إنما واخدها هواية".

نعم هواية؛ فمثلما يوجد من يهوى الموسيقى أو الرياضة فهواية "أبو أحمد" هى التنظيف "أنا عاشق للنضافة، بحب أمسك المقشة والجروف كل يوم الساعة 10 الصبح وأكنس شارع شهاب كله وأنا بدندن أغنية لأم كلثوم لحد صلاة الضهر وبعدها أنصب فرشتى وأبدأ اشتغل على نضافة".

لا يعينه على تنظيف صفائح القمامة وغسلها بالماء والصابون كل أسبوعين كما يشير إلى من وصفها بـ"دراعى اليمين والشمال" زوجته أم أحمد، مؤكدا " أنا عندى 60 سنة بس نشيط ومش بستخسر صحتى ولازم أطلعها فى حاجة مفيدة"، أما عن تكلفة مبادرته فيقول ببساطة "مبحسبش عشان متعبش".