لو هتشترى طرحة.. هاتيها من السيسى.. هتكسبى الطرحة وهتبقى ثورجية

لافة زرقاء كبيرة وضعت أعلى محل لبيع طرح الفتيات، كتب عليها بحروف كبيرة "الحاج حسنى حسن السيسى للمحجبات"، حيث تظهر كلمة "السيسى" بخط كبير لافتة لاهتمام كل من يعبر بجوارها، مجبرة بعضهم ممن يجوبون الشوارع لشراء الملابس الجديدة لاستقبال عيد الفطر على الدخول إلى المحل للشراء منه، ومجبرة البعض الآخر على الابتعاد عن المحل.

محمد أحد العاملين بالمحل قال لـ"اليوم السابع"، "اسم السيسى ده وش السعد علينا، وربنا رزقنا من وراه رزق كبير، اليومين دول يومين موسم علشان رمضان والعيد والناس بتنزل تشترى الهدوم بتاعت العيد وكل الحاجات اللى نقصاها، بس السنة دى الشغل كان مريح من أوله، لأن البلد ماكنش فيها أمان وكله كان خايف على فلوسه وعاوز يشيلها لوقت زنقة، مع أننا لينا مواسم تانية غير رمضان والعيد، موسم المدارس والأعياد التانية، بس بردوا السنة دى الحال كان مريح، لحد ما الفريق السيسى الله يحفظه شال عننا حكم الإخوان، والناس فرحت وبدأت العملية تشتغل والناس تتطمن وتنزل تشترى".

محل "السيسى" الذى يقع بشارع الأزهر يجذب إليه كل المارين من أمامه بشارع الأزهر يقبلون عليه، خاصة بعد وجود كلمة "السيسى" فوق المحل، فكثيراً منهم يعتزون باسم المحل لأنه على اسم الفريق عبدالفتاح السيسى، ويعتزون بكونهم أشتروا من محل يحمل اسم الفريق السيسى.

ويضيف "محمود" أحد العاملين أيضاً بالمحل، "فى ناس بتيجى تشترى مخصوص من المحل عندنا علشان الاسم، وخصوصاً المؤيدين لقرار عزل مرسى بيعدى علينا ويشترى مننا مهما كان السعر، وفى تعليقات كتيرة كنا بنسمعها "زى ربنا يباركلمك، وربنا يحرصكم، أنتوا اللى عليتوا مصر"، وكلام زى ده كتير".

وأضاف فى حالة أخرى، أن ما حدث أدى إلى اعراض جميع الإخوان أو من يرفضون ما قام به الفريق "السيسى" عن الشراء من المحل، يقول "فى زبونة منقبة جاتلى وقعدت تشترى، وبعد لما أخدت الشنطة بتاعت المحل وشافت عليها اسم السيسى، رفضت تشترى مننا وقعدت تقول "حسبى الله ونعم الوكيل"، وسابت الحاجة ومشيت.