عزة جلال: الإخوان خربوا البلد والسادات كان راجل..وتطالب مرسى بالرحيل

"أنا مركبة 6 شرائح و3 مسامير فى رجلى إلا إنى رفضت الجلوس فى البيت وقررت النزول للشارع ومشاركة ولادى وبناتى المظاهرات"، عزة جلال أبو زلظ سيدة مصرية أصيلة فى العقد الخامس من العمر شاركت المتظاهرين بالمنوفية مطالبهم بالرغم من سوء حالتها الصحية.

الحاجة عزة أكدت أنها تشارك فى المظاهرات منذ أكثر من 15 يوم وتقول "أول ما عرفت إنهم اختاروا واحد إخوانى يحكم المنوفية رفضت الكلام ده ونزلت مع المتظاهرين كل يوم من الساعة 10 الصبح للساعة 2 بالليل".

وتكمل حديثها بالتأكيد على رفضه الشائعات التى يطلقها أنصار تيار الإسلام السياسى على المتظاهرين، قائلة "بيقولوا فيه تحرش بين الثوار فى الميادين كلام كله غلط مش بيقولوا الله والرسول لازم يتقوا الله أفضل من الكلام ده".

تشارك الحاجة عزة بالمظاهرات من خلال تروسيكل خاص بأحد أفراد أسرتها يتولى مهمة نقلها للمشاركة فى المظاهرات وإعادتها إلى البيت مرة أخرى، موضحة "بسبب العمليات اللى أنا عملتها مش بقدر أمشى على رجلى فالحل الوحيد هو التروسيكل".

وعقدت مقارنة بين الرؤساء الذين حكموا مصر "كنت صغيرة أيام عبد الناصر أما السادات كان راجل وكنا مستريحين وعايشين كويس وبقى لينا بيت أما مرسى خرب البلد وورثها لجماعته وساب الشعب جعان، ولما الناس زهقت وتعبت نزلت الشارع".