الشيف "أمنية" مولودة فى إيدها "معلقة" خشب

"مولودة فى إيدها "معلقة" خشب، زى السمك لو طلعت من "المطبخ" تموت، قضت حياتها بين الطشة والتقلية والتسبيكة والملوخية، بالبالطو الأبيض الذى ترتديه أثناء عملها تحسبها "دكتورة" لكن فى الطبيخ؛ حيث تجرى عملياتها الجراحية على الكوسة والبامية وورق العنب، مستبدلة المشرطة بالسكينة والمغرفة، وخيط الجراحة بالأبرة والخيط لتقفيل الحمام والفراخ المحشية، ولديها جيوش من "التوابل" تساعدها على إنجاز مهامها الصعبة.
الشيف "أمنية طه" أحد الوجوه الرمضانية التى لن تراها على شاشة التليفزيون ولكنك ستجدها تعمل فى مطبخها وصومعتها بحرفية ومهارة منذ 6 سنوات منذ أن بدأت مشروعها لعمل الوجبات فى مطبخ منزلها وبيعها للمطاعم والشركات ولمقيمى الحفلات والأعراس.
من صغرها وحتى أتمت عقدها الرابع وهى مولعة بالطبيخ وتعشق صنع المحمر والمشمر لذلك درست الاقتصاد المنزلى وتخصصت فى التغذية وبعد تخرجها عملت عدة سنوات كإخصائية تغذية فى أحد المستشفيات العسكرية لكنها لم تجد نفسها إلا حين عادت لمطبخها وسط حللها وأدواتها وتوابلها وبوهراتها مؤكدة" روحى رجعلتى لما بدأت مشروعى لعمل الأكلات البيتى من 6 سنين ودلوقتى الشركات والمطاعم بتتصل بيا عشان تحجزها عشرات الوجبات كل يوم".
أما رمضان فله استعدادات خاصة عند الشيف "أمنية" تبدأها من قبل الشهر الكريم بشهر " بشترى الخزين اللى يكفينى الشهر كله وأجهز الخضار وأنضفه أقطعه وأسبك الطماطم وأتبل اللحوم والفراخ وأعصج اللحمة المفرومة وأفرم التوم وأشيلهم فى الفريزر عشان يبقى الأكل سهل فى التحضير" وتنصح كل ربة منزل" اتعبى يوم أو اتنين تجهزى فيهم حاجتك قبل رمضان وبعدها هترتاحى الشهر كله ولسه قدامك فرصة تجهزى أكل باقى الشهر وساعتها مش هتاجى أكتر من ساعة فى المطبخ كل يوم ونفس الشيء بالنسبة للعصاير ممكن تجهزيها من بليل أو تعملى كميات فى الفريزر وتاخدى منها ".
فريق عملها مكون من فتاتين يساعدنها فى عمل الوجبات التى يطلبها الزبائن فى رمضان وأكثر الأكلات التى يطلبونها فى شهر الصيام" المكرونة البشمل والمحاشى والمومبار لأنها صعبة فى العمايل وبيستلموا الأكل قبل الفطار بساعتين على الأقل بس الحجز قبلها ب 24 ساعة أو 48 ساعة لو كميات كبيرة."
"رمضان بيحب الأكل بس نخفف من الدهون".. هكذا نصحت الشيف ربات البيوت بالتقليل من استخدام "السمن" واستبدالها بالزيت "عشان نخفف الدسامة"، متابعة" و"عشان ندى للأكل الطعم ممكن نحط قطعة زبدة صغيرة ونكمل بشوية زيت يعنى لو هتعملى شوربة كريمة كفاية حتة زبدة صغيرة وشوية زيت ونص كوباية كريمة وكملى باللبن هتدى نفس الطعم بس من غير ضرر".