سيد الشربتلى.. دكتوراه فى العصير ورمضان شهر المكسب

سيد عبدالمنعم الشربتلى صاحب الثلاثين عاما يقف منذ 15 عاما فى شارع رمسيس لبيع التمر والسوبيا والعرقسوس، "احنا أصلا من الصعيد بس عيلتنا كلها بتشتغل فى المجال ده، أبويا وأعمامى كلهم موجودون فى الجيزة بيبعيوا تمر وسوبيا".

يعمل سيد فى الأيام العادية طوال ساعات اليوم من التاسعة صباحا حتى الساعة الثامنة مساء، أما فى أيام رمضان يعمل بداية من الساعة الثانية حتى السابعة مساء، ويتناقص الطلب عليه بعد العشاء، يقول: "احنا دلوقتى بنفرش الساعة 2 الظهر وبنقعد لحد صلاة التراويح، لأن فى الصبح الناس بتكون صايمة ومحدش بيشترى عصير غير وهو راجع من الشغل، يعنى بداية من الساعة 2 وبيفضل ضغط الشغل علينا لحد صلاة التراويح".

وبرغم قلة الطلب على سيد الشربتلى فى الأيام الماضية- قبل بداية رمضان-، إلا أنه مع دخول الشهر الكريم بدأت الناس تقبل على شراء العصائر، يقول "قبل 30 يونيو كان الحال تعبان خالص ومكنش فيه طلب على العصاير وفى وقت الثورة بدأت العملية تشتغل شوية، وبدأ الضغط يزيد، وبدل ما كنا بنبيع فى اليوم جركن أو جركنين، بقينا بنبيع 4 و5 جراكن فى أيام30 يونيو، بس دلوقتى الحمد لله ممكن نبيع 10 جراكن فى اليوم، وخصوصا أن ساعة المغربية بيكون الضغط شديد جدا، والناس بتبقى واقفة بالطابور".

تجد أمام عربته يافطة طولية مكتوب عليها "سيد الشربتلى حاصل على الدكتوراه فى جميع العصائر وزمالة كلية العطشانين بضمان المهراجا الهندى"، يقول عنها "أنا عملت اليافطة دى من سنتين لما لقينا الحال نايم قولنا نعمل حاجة جديدة كنوع من الدعاية تجيبلنا زباين، وبعد معملناها كل واحد يجى يبص عليا ويشوف اليافطة تشده وتعجبه، يقف يسألنى عليها، بس هى الحمد لله عاجبة ناس كتيرة، ويعنى خلتنا نشتغل شوية، وزودت إقبال الناس علينا شوية.