"عم ربيع" يصنع أدوات منزلية من خوص النخيل.. ويجارى الموضة على طريقته

"أنا راجل فلاح لكن مودرن.. أعمل من الفسيخ شربات".. بهذه الكلمات يصف ربيع الرفاعى (50 عامًا) نفسه، بعد أن جاء من الفيوم باحثاً على فرصة عمل فى مصر المحروسة، واستقر فى مصر الجديدة فى أرض الجولف، لفترة طويلة من الزمن، ولكن مع التغيرات الطبقية والظروف المتغيرة والمتعثرة، لجأ إلى مكان جديد ليعرض منتجاته من الأدوات المنزلية، التى يصنعها من خوص قلب النخلة، فى مكان حيوى يوجد به بعض المحلات التجارية الضخمة والعمارات الفخمة والزبائن من كل بلدن العالم، فاستقر خارج أسوار حديقة ميدان المساحة.

يقول عم ربيع: "الناس هنا زى العسل، وعندى زبائن من سكان المنطقة أجانب ومصريين مرتاحين وبيشتروا بسعر حلو وكمان منتجات مختلفة وجديدة، وتتميز بالأصالة المصرية القديمة"، ويؤكد: "أنا متابع الموضة، وبجاريها، ولكن على طريقتى الخاصة".

ويتابع رفاعى بأسف: "الناس ماعادتش زى الأول.. المصريين معروفين بالكرم، وكمان أصحاب مزاج بس مش عارف مين العكر مزاجهم، ربنا يخرب بيوتهم زى ما خربوا بيوتنا، والله أنا عندى أمل إن مصر ترجع تانى زى زمان والناس تقدر الفن الموجود فى الصناعة اليدوية".