دبلة "الزغلول" بلاستيك ومكتوب عليها اسم صاحبه مش وليفه

بألوان جذابة أحمر وأخضر وبرتقالى وقف "أسامة السيد" فى سوق الجمعة الشهير ببيع الطيور والحيوانات بمجموعة من الدبل البلاستيك شكل منها عقود طويلة لفها حول رقبته ليجذب الزبائن، وطبع عليها أسماءً متنوعة لصبيان وبنات حتى يختار من بينها كل زبون الاسم الذى يحمله، لكنهم لا يشترون الدبل لأنفسهم أو حتى لأحبابهم لكن لـ"الزغاليل" التى يربونها، ففى عالم الحمام لا يرتدى "الزغلول" الدبلة التى تحمل اسم وليفه ولكن التى تحمل اسم صاحبه.

يحكى "أسامة"، الذى يقف بفرشته كل أحد وجمعة فى السوق منذ عشرين عاما، قصة "دبل الحمام" التى يبيعها: "الدبل دى بيلبسها الزغلول فى رجله وهو عنده 20 يوم، وبيبقى مكتوب عليها اسم صاحبه وممكن كمان رقم تليفونه وعنوانه عشان لو تايه من صاحبه يعرف يوصله، وفيه ناس لسه بتستخدمها عشان تلف عليها رسائل زى زمان".

ولأنها ليست مصنوعة من الذهب أو الفضة كبقية الدبل لا تتكلف سوى نصف جنيه أو جنيه على الأكثر لبساطة تصنيعها.. "بتكون عبارة عن بكرة من البلاستيك وملفوف عليها استيكر ملون مطبوع عليه أسماء كتيرة عشان كل واحد يختار الاسم اللى على مزاجه وساعات بيشتريها هواة، بعملها لهم حسب الطلب أو يشتريها محلات تربية الطيور بكميات وبعدين سهل يتغير الاستيكر حسب المعلومات اللى محتاجين تسجيلها على الدبلة".

هناك مقاسات مختلفة من دبل الحمام "لازم يكون المقاس مناسب عشان لو واسع هيقع من رجل الزغلول ولو ضيق ممكن يعوره، ولازم نضم أصابع الزغلول على بعضها بأيدينا وإحنا بنلبسه الدبلة عشان تدخل بسهولة ومتأذيهوش".

ورغم أنه لا يبيعها إلا أن أسامة يشير إلى أن هناك أنواعاً أخرى من دبل الحمام "فيه دبل بتتصنع من الألمونيوم ويتنقش عليها اسم وعمر وفصيلة الطائر بتكون موجودة فى حديقة الحيوان".