فيسبوك
واتساب
الكلبان تربيا مع بعضهم البعض منذ الطفولة وسط جو أسرى ملىء بالرعاية والعطف والحنان، حتى وصلا إلى مرحلة البلوغ والتزاوج، وبالفعل تزوجا وأنجبا، ولكن ماتت الأم "ليزا" بعد إنجابها بـ6 أشهر، مما دفع الأب، "ريكو" إلى الامتناع عن الطعام لمدة شهر تقريبا، حتى زهقت روحه هو الآخر حزننا على وليفته.. هكذا يروى محمد خالد صاحب الكلبين تفاصيل القصة لـ"اليوم السابع"، قائلا "اشتريت الكلبين دول من أكتر من 3 سنوات، وعلى الرغم من أنهم نوعين مختلفين "Pitbull و "rottweiler، وكتير نصحونى أنى ماجبش أنواع مختلفة علشان يكون سهل التزاوج بينهم فيما بعد، إلا أنى لاحظت العكس تماما، فهم من أول يوم كان بينهم علاقة ود، حتى وصلوا لسن التزاوج وفعلا بقوا وليفين فى منتهى الرومانسية".
يتابع "وكانوا دايما متعودين ياكلوا ويلعبوا مع بعض ولو عاقبت واحد فيهم ومنعت الأكل يمتنع التانى عن الأكل، حتى أتراجع عن العقاب، وكانوا متعلقين ببعض بشكل غريب لاحظه كل الناس، حتى لو حد ضايق أو أزعج واحد منهم يبدأ التانى فى الدفاع عنه باستماتة، وكأنها فعلا علاقة حب بين بنى آدميين".
ويستكمل القصة: "بعد ما خلفت "ليزا" أول جرو لهم، بدأت صحتها فى التدهور، وبدأت فى الامتناع عن الأكل، وبدا "ريكو" يدخل فى حالة اكتئاب ويمتنع عن الأكل حزن على حالتها اللى بتسوء يوم بعد يوم".
وبعد موت "ليزا" امتنع "ريكو" عن الأكل والشرب واللعب تماما، واستمر على الحالة دى، أكتر من شهر لغاية ما مات، وعلمنى أنا شخصيا درس فى الإخلاص والرومانسية عمرى ما هنساه".
