م.محمد عاطف عبد المنعم يكتب: لسان سجين سجان

لسان سجين سجان
أشكال كتير وألوان
محبوس جوا الفم
محروس من الأسنان
قلوب بسحره تدوب
تقوم بسببه حروب
يقلب شروق لغروب
يقتل صاحبه الإنسان
يغنى بكلام جميل
يهمس فصمت ليل
يشفى ألم العليل
له سحر زى الجان
يخنق يقف ف الزور
يحلف ويشهد زور
ينطق كلام ب غرور
كدب ونقص وحرمان
لو يوعد الوعود
الكلمه منه عقود
قليل وكان موجود
فى زمن غير الزمان
فى الغيبة والنميمة
والفتنة والشتيمة
ذنب كبير وجريمة
مذكورًا فى القران
يصلح أى شجار
يكتم كتير أسرار
يذكر مع الأبرار
وأذان بصوت رنان
أوقات يكون شرير
أوقات بيعمل خير
شكر وحمد وتكبير
كالثمرة فى بستان
خليك معاه عنيد
ورقيب عليه وعتيد
هتعيش معاه سعيد
وتكون معاه ف أمان
لسان سجين سجان
أشكال كتير وألوان
محبوس جوا الفم
محروس من الأسنان