بتسمع منير؟.. بتحبه؟.. مجنون بيه؟.. ماجد وفاترينته "للمنايرية فقط"

ماجد من سنة حول باترينة السجاير لبيع وابتكار منتجات منير فقط.. والنتيجة 9 محلات فى 6 محافظات.. "الرزق على الله".

خيط رفيع يفصل بين الإعجاب بمطرب والجنون به.. يجب أن تتعداه لتجد خيط آخر يفصل بين هذا الجنون وبين "ماجد عبد المنعم" الشاب العشرينى الذى يجلس على حافة عالم ممنوع الدخول لأى من تفاصيله سوى بختم "محمد منير"، عالم امتد من البحث أيام عن شريط نادر وسفرية لحفل فى أقصى المحروسة إلى تحويل باترينة والده التى كانت مصدر دخلهم إلى موقع لا يبيع أى شىء إلا بعد صبغة بلحظة من مشوار منير، بداية من التيشيرت والمج إلى فواحة السيارة وولاعة السجائر وكشكول المدرسة، فكرة مجنونة راودته عشرين عاما ونفذها العام الماضى فقط، والآن توسعت إلى عين شمس والمعادى وبولاق والإسكندرية والإسماعيلية والسويس والبحر والأحمر وأسوان.

على بعد خطوات من سينما كايرو بوسط المدينة ستقابلك كلمات تأخذك إلى قلب رحلة منير بداية من "بنتولد" إلى "لو بطلنا نحلم نموت"، و"على صوتك بالغنا"، و"كل المفروض مرفوض"، مغلفة بابتسامة منير السمراء وذكرى من صوت الملك فوق أشياء لم تتوقع أن تراها عليها من قبل، وإلى الجوار يجلس الشاب ماجد ويقول: "منير تقريبا هو اللى شكل كل حياتى، وعشان كده كنت دايما بتمنى إن كل حاجة عندى يبقى فيها جزء منه، وبدأت اعمل صفحة ألم فيها عشاق منير ولقيت معظمهم بيدوروا على نفس اللى بدور عليه".

يخفض صوت سماعات تنبعث منها كلمات أغنية "حدوته مصرية" ويكمل: "كانت فكرة صعبة إنى أقنع والدى يسيب الباترينة اللى عاش عمره فيها لبيع السجاير والحاجات البسيطة عشان أعمل فكرتى بس حصل وأقنعته، وبدأت أشترى أى حاجه عليها منير وأجيبها فيها وخصصتها لكده بس، لكن بعد شهرين لقيت الحاجات اللى موجودة فى السوق مش كفاية بدأت ألم كل المواهب اللى جمعتنى بيهم حفلات الملك وكانوا متميزين فى التصميم والطباعة وأقولهم أفكارى وبدأنا نشتغل، لحد ما بقى فى تصميمات لكل حاجة ممكن تحتاجها وعليها محمد منير".

وانتشرت فى كل البلاد دية من إسكندرية لأسوان والبحر الأحمر؟.. يبتسم ويجيب: "منير قال الرزق على الله، وأنا أول ما بدأت مكنتش متخيل الفكرة تنجح وخصوصا إن بقالى سنين فى المكان ده وعمرى ما توسعت، كان كفاية بالنسبالى أنى أبيع سلاسل وحاجات تلصق وشويت إكسسوار بسيط، لكن الموضوع نجح بطريقة مش طبيعية، ولما بدأنا نصمم حاجات خاصة بينا انتشرت أكثر بين معظم عشاق منير، وده خلانا نتوسع بأربع أماكن فى القاهرة وخمس محافظات ثانية ولسة إن شاء الله".

"منير مش بس نجم.. منير بالنسبالى أسلوب حياة".. كلمات يلخص بها ماجد سبب عدم إمكانيه تنفيذ الفكرة مع أى نجم آخر، ويتابع: "مستحيل النجاح ده يحصل مع أى نجم عادى الفكرة بالنسبة ليا وللمنايرية إن منير حياة بنعيشها، ورغم النجاح بس مش هحس إنى نجحت بجد إلا لما منير ييجى يزور المكان بنفسه ويشوف إحنا قد إية بنحبه".