"النهاردة وبكرة أى قطعة ب 50 جنيها".. لافتة وضعها أحد محلات الملابس بشارع طلعت حرب كوسيلة لجر رجل الزبائن، فى حين وضع محل آخر لافتة كتب عليها "خصم 30% على الترنجات بمناسبة الأعياد"، ولم يقتصر الأوكازيون على أصحاب المحلات، فحتى البائعون الذين يفرشون بضاعتهم فى الشارع كتبوا لافتات بعروضهم المميزة فى محاولة يائسة لكسب الرزق.
أحمد عبد الله مدير أحد محلات الملابس فى شارع 26 يوليو يقول لليوم السابع:" الأوكازيون الصيفى بيخلص كل سنة بعد شهر 8 بس بسبب ظروف البلد والحظر اللى منع الناس من النزول اضطرينا نمد الأوكازيونات لبعد العيد عشان نكسب زبون".
رغم ذلك يؤكد صاحب المحل:" من قبل العيد بشهر مكنش بيبقى فيه مكان لرجل فى شارع 26 يوليو وطلعت حرب من كتر الزحمة والناس اللى بتشترى لبس العيد لكن السنة دى الجو هادى والحركة قليلة حتى مع الخصومات".
الظروف الاقتصادية الصعبة جعلتهم لا يشترون الملابس المستوردة إلا من الصين لأنها الأرخص سعرا كما يشير "عبد الله"، قائلا:" كل المعروض صينى، ومنقدرش نستورد من مكان تانى أغلى عشان عارفين ظروف الناس ولو استوردناه مش هيتباع، وأسعار اللبس الصينى بتبدأ من 35 جنيها للقطعة وصولا لـ100 جنيه بعد الخصم".
مشيرا إلى أنهم سيستمرون فى عرض الملابس الصيفى حتى انتهاء العيد قبل أن يبدأوا فى عرض الملابس الخريفى والشتوى" كل اللى معروض دلوقتى تصفيات بضاعة ومشترناش جديد عشان القديم لسه فى المخازن، لما نخلص منه ونسدد تمنه هنشترى ملابس الموسم الجديد".
تم أضافة تعليقك سوف يظهر بعد المراجعة