شباب كراكيب، جمعوا كل كراكيبهم وحولوها لروبوت آلى، وطائرة شراعية، وغواصة، وغيرها من الاختراعات الإلكترونية.
المهندسة رباب حسن، أحد مؤسسى "كراكيب"، قالت، لليوم السابع، "إحنا شوية مهندسين مجانين، ما استفدناش باللى اتعلمناه فى الكلية، فقررنا نعلم نفسنا بنفسنا، ونعمل حاجة جديدة نفيد بيها الناس اللى حوالينا، ونعديهم نخليهم مجانين زينا."
وعن هدفهم من تأسيس "كراكيب" أوضحت"هدفنا كله أن الناس تتعلم حاجة جديدة وتشارك معانا بأفكارها أو الكراكيب اللى موجودة فى حياتها، وتكون بالنسبة لهم التكنولوجيا لعبة زى ما هى بالنسبة لنا."
فريق كراكيب، الذى يضم 6 من المهندسين الشباب هم: مينا عفت رئيس الفريق، وشادى جمال، وسارة صلاح، وسيلفيا خليل، وريم محمد و رباب حسن، تجمعوا أثناء دراسته بكلية الهندسة جامعة الإسكندرية قسم اتصالات تحت هدف واحد، وهو ابتكار أفكار جديدة والخروج عن المألوف، وبعد التخرج كونوا الفريق وبدءوا فى عملهم.
"إزاى نستخدم الكراكيب فى فكرة جديدة هو عملنا وكمان مش شرط كراكيب ممكن حاجات عندنا مش بنستخدمها وبنركنها"..هذا ما أكدته رباب، مضيفة أنهم يستخدمونها فى عمل إنسان آلى، روفر للمشى على الطرق المكسرة، باب إلكترونى وغيرها من الاختراعات.
ودعت رباب كل من لديه كراكيب يريد الاستفادة منها، أن ينضم لفريق كراكيب، مضيفة أنهم يقومون بتنظيم ورش عمل حول كيفية صنع روبوت باستخدام الكراكيب، وكذلك طائرات وغواصات.
