دعوة ليوم مفتوح للرقص بمختلف أنواعه بالزمالك.. الخميس المقبل

"علشان البهجة وعلشان الرقص مش هو الأفلام الهابطة والمطاوى، وعلشان الناس محتاجة تتصدم وتستوعب إن أى حد من حقه يقدم فنه فى الشارع" فكرت رضوى سمير (21 عامًا) فى الدعوة إلى يوم مفتوح للرقص بمختلف أنواعه يبدأ فى الرابعة من عصر الخميس 24 أكتوبر ويستمر حتى السابعة، بالزمالك، بمشاركة فرقتى "عواميد نور" و"LET'S PLAY PERCUSSION"، إضافة إلى مغنى راب فرنسى.

تقول رضوى "أنا فى الأساس من الإسكندرية، وكنا متعودين نعمل عروض فنية فى الشارع، وبروفات وحتى عروض رقص، لكن لما جيت القاهرة ما لقيتش دا كتير، ويكاد يكون مش موجود، علشان كده قررت أكسر القاعدة وأوصل للناس فكرة إنه من حق أى حد يقدم فنه فى الشارع".

وتضيف "كل اللى فى دماغ الناس عن الرقص هو الصورة اللى بتقدمها الأفلام الهابطة، لكن ما فيش ناس كتير تعرف إنه فنون متنوعة جدًا وراقية جدًا، ودا كان الهدف الثانى للدعوة إننا نعرف الناس بفنون الرقص المختلفة ونخليها مستعدة تتقبله".

تعرف رضوى، وأصدقاؤها الذين دعموها لتفعيل الدعوة أن احتمال مواجهتها رفضًا من المجتمع احتمالاً كبيرًا، رغم أن ردود الفعل على موقع التواصل الاجتماعى "فيسبوك" حتى الآن مشجعة، وتقول "طبيعى أن الناس بسبب الصورة النمطية عن الرقص تهاجمنا، وإحنا متوقعين دا وعاملين حسابنا على كل الاحتمالات، علشان كده فى متطوعين لمواجهة التحرش فى حالة إن حد حاول يضايق المشاركات، وعلشان كده كمان إحنا معانا تصريح رسمى".

وتوضح رضوى أنها لم تكتفِ بـ"الفيسبوك" كوسيلة لإخبار الآخرين بفكرتها، ولكنها سعت طوال شهر كامل، لأن تضع أقدام الدعوة فى الشارع، فتنقلت بين هيئات حكومية مختلفة لتطلب تصريحًا رسميًا بتنظيم يومًا مفتوحًا للرقص، تقول رضوى: "اخترنا منطقة الزمالك كنقطة انطلاق للفكرة اللى بتمنى تتحول مستقبلاً لمهرجان كبير، واخترناها لهدوئها وبعيدًا عن أية ميادين قد تضعنا فى أطر سياسية، وعلشان الموضوع يكون رسمى وما تحصلش أى مشاكل قررنا استصدار تصريح بإقامة الحدث فى المنطقة"، وتضيف "استغرق التصريح منا شهرًا كاملاً تنقلنا خلاله بين نقطة شرطة الزمالك، وقسم شرطة حى غرب، وأخيرًا أخبرونا أنه يجب أن نذهب للمجلس المحلى، وانتظرنا موافقة وزارة الداخلية وفى النهاية تمكنا من إصدار التصريح".