"الأسطى أحمد" متحديًا اللجان الشعبية: "فتشنى فتش"

لأنه يقضى فيها وقتًا ربما أكثر من بيته، كان من الطبيعى أن يحاول كل منهم وضع لمسته الخاصة على سيارته النقل، ويكتب عليها عباراته المفضلة، من حكمة إلى عبارة مرحة، أو حتى اسم حبيبته أو أبنائه.

ولكن أحمد سمير سائق العربة الربع نقل كانت له طريقته الخاصة، والمختلفة جدًا فى التعبير عن رأيه، فيجعلك لا تقوى على مقاومة ضحكاتك حين يمر بك، فترى على ظهر سيارته ملصقًا كبيرًا يضم مشاهد متنوعة من فيلم "ابن حميدو" للفنان الراحل إسماعيل ياسين، وكتب فوقها بخط واضح "فتشنى فتش!" ليعيد إلى ذهنك مشهد "ابن حميدو" فى الفيلم الشهير، حين كان يستقل السيارة التى تحمل المخدرات، ويحاول أن يستفز "الشاويش عطية" ليفتش السيارة ويلقى القبض على المجرمين.

ويقول أحمد لـ"اليوم السابع": "من ساعة الثورة بتاعة 30 يونيو والكماين كترت، وكمان اللجان الشعبية، وكل واحد يقابلك يعمل لك فيها لواء.. فاتغظت من الحكاية دى، علشان كده كتبت كده على العربية"، ويضيف "ساعات أعدى على لجنة أو كمين للجيش ويقرأون المكتوب فيضحكوا ولما يفتشونى ويلاقونى سليم أعدى، وساعات ناس تانية تضايق من الكلمة، لكن بردو بعدى علشان أنا ماشى عدل".

ويتابع "إحنا شعب ابن نكتة، ولازم نضحك علشان نعدى أيام الهم اللى إحنا فيها دى، واللى ما يضحكش، ومش عاجبة علقت له "لو مش عاجبك طلقنى".