عم أبو محمد عايز يبقى مستشار الريس

هيئته كشيخ العرب همام، لهجته صعيدى أصيل، يناديه سكان ميدان التحرير بأبو الثوار.. إنه المواطن البسيط الذى تواجد داخل ميدان التحرير منذ اليوم الأول للثورة وحتى الآن، حلمه هو السهل الممتنع فهو لا يتمنى كرسى الرئاسة إنما كل ما يتمناه جمع كل المصريين على كلمة واحدة ورئيس واحد. واختيار فريق رئاسى يصبح فيه "مستشار الريس".

"اليوم السابع" تحدثت مع "أبو الثوار" الذى قال لنا: "مصر داخله على حمام دم والبلد دى مش حيرجعها غير الوحدة يا ولدى، ونفسى الطوائف كلها تتجمع تانى زى أيام الثورة الجميلة، وأنا بوجه رسالة للشعب المصرى علشان يفوج، الجماعات الإسلامية يتحدوا ويشاوروا على واحد بس علشان ميحصلش خلاف بينتهم، والقوى السياسية بردوا يشاوروا على واحد بس يتفجوا عليه، وكمان إخواتنا المسيحيين مننساهمش يختاروا واحد منهم، ويتجمعوا التلاتة، وتتعمل الانتخابات واللى ينجح فيهم يكون الريس، والشعب المصرى كله يكون وراه مسلم ومسيحى، والاتنين التانيين يا ولدى يبجوا استشاريين للريس، ويبقى إحنا كده وفجنا بين جميع طوايف الشعب".

أبو الثوار يرفع لافتة متنقلة مكتوبا عليها بخط واضح وكبير: "الحل"، ويقابل باحترام من الثوار بسبب ابتسامته التى لا تفارق وجهه.