خبيرة التوظيف رشا خليفة: وما الحياة إلا... هدف وخطة وشجاعة على التنفيذ !

اليوم سوف نتحدث عن موضوع مهم جدا ... التخطيط ..

التخطيط حاجة مهمة وأساسية مش بس فى شغلنا لكن كمان فى حياتنا.. كل واحد فينا المفروض يكون مخططا لحياته ومستقبله ومحددا بالضبط كل خطوة هتوصلوا لإيه وهيوصل ليها إزاى؟

عايزة أقولوكم إن التخطيط دا مش حاجة جديدة ولا حديثة... دا من بداية الخلق... قصص التخطيط كثيرة جدا فى القرآن الكريم... يعنى مثلا قصة سيدنا يوسف كانت مثالا رائعا جدا على التخطيط.

"يوسف أيها الصديق أفتنا فى سبع بقرات سمان يأكلهن سبع عجاف وسبع سنبلات خضر وأخر يابسات لعلى أرجع إلى الناس لعلهم يعلمون. قال تزرعون سبع سنين دأبا فما حصدتم فذروه فى سنبله إلا قليلا مما تأكلون ثم يأتى من بعد ذلك سبع شداد يأكلن ما قدمتم لهن إلا قليلا مما تحصنون ثم يأتى بعد ذلك عام فيه يغاث الناس وفيه يعصرون" "46 - 49 يوسف".

سيدنا يوسف خطط للمستقبل ... يزرعون 7 ويجنون بعدها 7 .

ومن الآيات التى أعطت قاعدة مهمة للتخطيط الناجح، قوله تعالى "لِكُلٍّ جَعَلْنَا مِنْكُمْ شِرْعَةً وَمِنْهَاجَاً" ( المائدة :48) ، أى سبيلاً وسنة وطريقا سهلا واضحا إلى المقاصد الإسلامية (الصابونى: 524) .
الامثلة على التخطيط فى الإسلام لا تعد ولا تحصى... المهم أننا واجب علينا فعلا أن نتعلم منها بما يفيدنا فى حياتنا العملية أو كمان
حياتنا الخاصة...

خلينا نخش فى الموضوع ونتكلم يعنى إيه أصلا تخطيط؟

مفهوم التخطيط "هو أسلوب أو منهج يهدف إلى حصر الإمكانيات والموارد المتوفرة ودراستها وتحديد إجراءات استغلالها لتحقيق أهداف مرجوة خلال فترة زمنية معينة".

يعنى أحدد أنا إمكانياتى إيه؟ والموارد المتاحة إيه؟؟؟ وأنسب طريق لاستغلالها إيه؟

بالنسبة لأهمية التخطيط ...
1- التخطيط بيساعدك على تحديد اتجاهاتك.
2- بيساعد طبعا فى تحقيق توازن بين الموارد المتاحة والاحتياجات المطلوبة.
3- بيساعدك التخطيط على زيادة الكفاءة والفاعلية.
4- كمان بيضمنلك وجود رقابة ومتابعة مستمرة.
5- بيساعدك تحدد الوقت والتكلفة لكل عمل بتقوم بيه.
6- التخطيط بيساعدك أنك تكون مستعدا للخطوات القادمة.
7- التخطيط كمان بيجعلك تتخذ قرارات أفضل.

التخطيط ليه مراحل...
أولا.... تحديد الهدف المراد الوصول إليه .. من غير هدف واضح مفيش تخطيط.
ثانيا... دراسة العوامل المحيطة والموارد المتاحة إللى من المفترض أنها تساعدنى فى وضع الخطة لأنها بتعرفنى إيه المتاح وإيه إللى ممكن أحتاجه فى المستقبل.
ثالثا .... تحديد البدائل المتاحة وإللى ممكن أستفيد منها.

التخطيط كمان ليه أنواع...
1- تخطيط طويل المدى "ودا غالبا ما يعرف بالخطة الخمسية كتير بنسمعها فى تصريحات الحكومة هههههه لأنها بتكون خطة طويلة المدى غالبا ما بتكون 5 سنوات".
2- التخطيط المتوسط المدى "ودا غالبا بيكون ما بيت سنتين لـثلاث سنوات".
3- التخطيط قصير المدى "ودا يطلق على أى خطة صغيرة يعنى مثلا أسبوع – شهر – 3 شهور ...إلخ المهم أنها أقل من سنة.

علشان أعمل خطة لازم ولابد من توافر شروط معينة ...
أولا : الأهداف..
1- أن يكون الهدف المراد الوصول إليه واضحا ومحددا وصريحا.
2- الاقتناع بالهدف المراد تحقيقه.... لأنى لو مش مقتنع بالهدف مش هقدر أنفذ الخطة بنجاح.
3- أن يكون الهدف المراد تحقيقه واقعيا... يعنى بلاش أعيش دور رجل المستحيل وأنا بحدد الهدف.
4- أن تكون الأهداف الموجودة متناسقة مع بعضها بحيث يسهل تنفيذها.
5- أن تكون الأهداف قابلة للقياس ... علشان أقدر أحدد الخطة بتاعتى ماشية فى الاتجاه الصحيح ولا لا.
ثانيا : التنبؤ....
بمعنى أنى المفروض أكون محدد الخطة بتاعتى دى هتكون نتيجتها إيه بالضبط، ودا بيعتمد على البحث إلى بعمله قبل ما بخطط لأنى بكون دارس الدنيا كويس جدا وبكده الخطة بتاعتى يكون ليها أثر جيد وتحقق الهدف المطلوب.
ثالثا : السياسات...

المقصب بالسياسات هى القواعد والمباديء إلى من المفترض أنها بتحكم العمل... والمبادىء دى بتكون زى إرشادات لفريق العمل تحكم تصرفاتهم وأسلوب العمل المطلوب.
رابعا : الإجراءات...
ودى بكون محدد فيها الخطوات التى سيتم اتباعها لتنفيذ الخطة بفاعلية.

وأنا بعمل خطة أراعى شوية معايير..
1- الدقة فى تحديد الاحتياجات.
2- الواقعية..
3- تحديد المصادر التى سيتم الاستعانة بها.
4- الفترة الزمنية.
5- التكاليف المالية التقديرية .

وبكده يكون خلص كلامنا عن التخطيط ... وأرجع تانى أفكركم

كل إللى محتاجه ... هدف واضح وخطة مرتبطة بزمن محدد وشجاعة على تنفيذها.