سعيد حامد شحاتة: أنت الزبيب والتمر والفول والخُشاف

يا صاحب الصون والعفاف
يا اللى شاركت ف يوم أُحد
وطلعت من سلسال مناف
يا مركّب الليل ع النهار
ومنيّم الموت ع الكتاف
قاعدين ليلاتى نسبّحك
يا رب أرباب لئتلاف
أنت المَلِك والمُلْك
والناس النّضاف
وأنت الزبيب والتمر
والفول والخُشاف
وأنت انتصار الذلّ
..فى نهاية المطاف
قاعدين ليلاتى نسبّحك
يا زارع الخوف فى الضعاف
يا مفسّر الأحلام غلط
ومضاعف السّبع العجاف
يا مقوّى قلب الكلب
ومعلّمنى أخاف
أنت المَلِك والمُلْك
والبيت والطّواف
وأنت اختلاط الدم وقت الاختلاف
وأنت اللى هتعدّ الغنم
وأنت اللى هتسوق الخِراف
قاعدين ليلاتى نسبّحك
يا رب أرباب لئتلاف
يا اللى شاركت ف يوم أُحد
وطلعت من سلسال مناف
************