كيف يقضى الشباب ليالى رمضان الصيفية؟

أيام وليالى رمضان فى الصيف تختلف عن مثيلاتها فى الشتاء.. كيف يقضى الشباب ليالى رمضان الصيفية.

محمد نبيل - 20 سنة- طالب بأكاديمية الفنون المسرحية: أنا أعشق شىء اسمه كمبيوتر ونت ما بتفرقش إحنا فى رمضان أو غير رمضان كل وقتى على الكمبيوتر.

أيمن البدرى - 25 سنة - يعمل بإحدى شركات الاستيراد والتصدير: أنا أعمل طول النهار وفترة الليل بعد صلاة التروايح أخرج مع أصحابى فى أى خيمة رمضانية.

رشاد غنيم – 22 سنة - يبحث عن عمل: أكيد رمضان مشهور بالعزومات، فكل يوم فى مكان معزوم عند أقاربى ولازم بعد الفطار نسهر معاهم وغالباً مش بعرف أشوف أصحابى إلا يوم وقفة العيد.

محمود على – 30 سنة - أعمال حرة: شهر رمضان شهر للعبادة بعد صلاة التروايح اقرأ القرآن وأجلس مع أسرتى ونادراً لما أخرج مع أصحابى، لأن الشوارع بتكون زحمه جداً جداً.

نادر حمدى – 28 سنة – يعمل محاسب فى إحدى مكاتب المحاسبة: أنا بحب أوى أخرج مع أصحابى بليل لكن من خلال تجربتى فى الأيام القليلة السابقة حيكون صعب أوى أنى أخرج تانى لأن المرور صعب أوى نهارو ليل.

مروة أحمد – 25 سنة – تعمل فى إحدى شركات الاتصالات: أحياناً بيكون عندى شغل بعد الفطار وغير كده بحب أشاهد بعض المسلسلات وخاصة مسلسل يسرا.

ميرنا محمود – 21 سنة – لا تعمل: أنا بحب مسلسلات رمضان جدا وبحاول أتابع أغلبية المسلسلات ليل والنهار، لأن المسلسلات كتيرة أوى.

كريم محمود – 22 سنة – يعمل فى أحد فنادق شرم الشيخ: رمضان مختلف تماماً هنا الليل عندنا هو الشغل أكتر من النهار وأغلبية الموجودين هنا سياح.

يحيى محمد – 31 سنة – وكيل نيابة: المفروض أنى بحب أخرج مع أصحابى، لكن الزحمة الموجودة فى كل مكان بتكون السبب فى إلغاء كثير من السهرات خارج المنزل.