ناوى أدخل الانتخابات.. وماشى فى الإجراءات.. والسياسة خد وهات.. وسيبك من إللى فات
مش جاى أقولك هات.. بالعكس أنا إللى هدى.. آدى يا سيدى الخطوات.. أسمع بقى إللى
عندى.. أول ما تنتخبنى وتطلع النتيجة.. وأنجح فى الانتخابات هنبتدى حياه جديده.. مفيش
زراعه تانى بالمجارى.. وقلب القاهرة هيبقى سكنى مش تجارى.. وهحل أزمة المرور
والطوابير.. وهخلى موكب الوزير عربيتين بالكتير.. ومفيش بعد كده واسطه ومحسوبية
ومفيش حاجة هتمشى بالتزوير.. هخليها تانى مصر أم الدنيا.. وهخلى الناس تحب الكوسة
زى الخضروات التانية.. هلغى قانون الطوارىء.. إللى خلى الشرطة بحقوقنا تخل
وهنشط موظفين الحكومة.. وهلغى الروتين الممل ...وههتم جدا بالصحه والتعليم
ده حتى العقل السليم فى الجسم السليم.. وهخلى مصر صديقه للبيئه.. وهفرض غرامات على
التدخين.. هو أنا ناقص تبقى حريقه.. وأفضل أعالج فى مدمنيين.. ولو لقيت أسعار اللحمة
نار.. عمرى ما هتأخر.. أنى أشمع محل الجزا.. إللى غلاها بالشمع الأحمر.. هوفر لكل
شاب فرصه عمل.. وهخلى المصرى ينضرب به المثل.. وهخليك تشرب مية من غير لون
مش إللى كنت بتشربها بألوان البونبون.. وهخلى الجنسيه المصريه حصانه للى شايلها
وهحاسب كل مسؤول على أى حاجه هيعملها.. خلاص وصلت للنهاية.. وأدى يا سيدى كل
الحكايه.. ناوى تنتخبنى.. ولا هتضحك عليا.. بس ياريت تخلى بالك من ابنى بعد ما يتقبض عليا.
مشاركة
اضف تعليقاً واقرأ تعليقات القراء
مشاركة
