الدكتورة هبة ياسين تكتب: الحب وسنينه 1

سواء كنت ممن جربوا الحب، أو ممن لم يجربوه، فستجد نفسك وقد سمعت عن إحدى مشاكله وحكاياته التى لا تنتهى بشكل أو بآخر، والسؤال هنا هل فعلاً "الحب بهدله؟"، كما يقولون، أم أن هناك مشكلة أخرى نحن لا نعرفها؟

والحقيقة أن الإجابة الشافية ليست عندى، إنما أنا أحاول فقط أن أخمن أحد أسباب هذه (المطبات) التى نقع فيها ونسمع عنها كل يوم، فقد لا يكون العيب فى الحب نفسه، وإنما كما قالت الست "ثومه"، "العيب فيكم يا فى حبايبكم"، لهذا أرجو الانتباه، فإن كنت أنت أو من تحب واحد من هؤلاء الذين سأتكلم عنهم، فلا عجب أن تنتهى قصة حبك بمأساة، لكن حينها كن منصفاً ولا تلصق كل التهم بالحب أو غيره.

1ـ الشخص الهستيرى: النوع ده من الناس سواء كان راجلاً أو ستاًَ غالباً يكون جذاباً جداً، وسيماً أو جميلة، واخد باله من نفسه ع الآخر، ودايما بيقول كلام حلو ويحسسك أن مشاعره حارة وقوية، عشان كده النوع ده للأسف بيوقع فى شباكه ناس كتير جداً، وهو فى حقيقة الأمر لا يحب أى منهم، هو بيحب حالة الحب نفسها، بل على العكس تماماً تجده يتهرب من الارتباط الجاد، لأنه سريع الملل من الأشخاص، وفى أغلب الحالات بيكون بارد حتى جنسياً، فهو أو هى شخص للعرض فقط، يلمع من بعيد لكن لا قيمة له من قريب، عشان كده النوع ده بيرتبط وينفصل كتير جداً، وغالباً لأسباب وهميه وتافهة.

2ـ الشخص النرجسى: ده بقى واحد متمركز حول نفسه، يعنى مابيفكرش غير فى نفسه وبس وكأنه محور الكون، وليذهب الباقون إلى الجحيم، شخص عاشق لذاته ويرى أنه مميز ومتفرد عن الآخرين، عشان كده بيحس أنه مش مطلوب منه أنه يعمل أو يقدم حاجه لأى حد، خاصة شريك حياته وكفاية أوى أنه معاه، إنما الآخرون هم اللى لازم يتعبوا ويبذلوا عشانه، النوع ده بيستغل دايما كل اللى حواليه على أد ما يقدر، عشان كده بيستنزف الشخص اللى بيقع فى حبه، ونادرا ما يشعر أنه مطلوب منه أن يقدم مقابل.. وللحديث بقية السبت القادم بإذن الله..