تأسيس الحملة القومية لجعل كرسى الرئاسة تيفال!

أطلق عدد من نشطاء الفيس بوك جروب جديد تحت عنوان "الحملة القومية لجعل كرسى الرئاسة تيفال.....عشان ما يلزقش"، إذ بلغ عدد أعضاء الجروب حتى كتابة هذه الكلمات نحو 2893، مضيفين صورا لكراسى مصنوعة من مواد مختلفة مثل الحديد والخشب والتيفال ولكن بتراكيب مختلفة تؤدى إلى عدم راحة الرئيس ومن ثم "زحلقته" بسرعة، وذلك على حد قولهم.

وقد تراوحت آراء أعضاء الجروب ما بين الرفض للفكرة والموافقة عليها إذ قالت شيماء سليم "يا جماعة إحنا لسه هانستنى لما يقعد ومايلزقش طب ما إحنا بالمرة نعمله كرسى تيفال بردوا بس بزاوية مايله شويتين لقدام علشان اللى يقعد عليه يزحلق على طول وما ياخدش وقت معانا ونخلص بقى".

وأضاف وليد عثمان قائلا "حلو موضوع التيفال دا كان فين من زمان ربنا يسهل ويكون تيفال من اللى بيزحلق"، وذكر على نبيل "الفكرة مش أنه يزحلق ولا لأ، المهم بعد ما يتزحلق هيروح فين، لازم يحطوا الكرسى فى مكان عالى يناسب مقام الريس"!
فيما جاءت آراء آخرين رافضين للفكرة إذ قال أيمن قاسم "والله لو عملتوه أيه بردو هايلزق"، فيما قال فادى عماد "على رأى سعد زغلول مافيش فايدة".