حملة "لسانك سكر".. ترفع شعار "الحوار أرقى"

نظم مجموعة من الشباب على الفيس بوك حملة "لسانك سكر" ضد الألفاظ المبتذلة ترفع شعار "الحوار أرقى"، وقد وصل عدد أعضائها إلى أكثر من 14 ألفاً تقريباً، وذلك منذ إنشائها فى أول يناير الماضى، مما يدل على نجاح الفكرة وإقبال الشباب عليها والتى تتلخص فى دعوة الشباب إلى حوار أكثر رقياً فى الشارع المصرى، الذى انتشرت فيه الشتائم بشكل ملفت، خاصة بين الباعة الجائلين وسائقى الميكروباصات، محاولين تذكرة المشتركين فى الجروب ومتصفحى الفيس بوك إلى نهى كل الأديان السماوية لهذه العادة البغيضة.

ويستهل مؤسسى الجروب حملتهم قائلين:
"ببساطة جداً.. إحنا شباب مصر العاقلين جداً والطبيعيين جداً.. وده الجروب الخاص بينا ببساطة أكتر.. إحنا ناس بتحب بعضها ونفسها.. وبنخاف على بعض بجد.. لأننا أصحاب بجد
بنتكلم فى الكورة والتنمية البشرية.. بنحب الأزهر والكنيسة.. بنروح الأهرامات وبرج القاهرة.. بنقرأ كتب.. وبنعمل شات.. يعنى ملناش أى لون.. إحنا بنمثل نفسنا
بنعشق صوت فيروز ومنير لما يغنى ساح يا بداح يا سؤال جراح
بنبكى لما نسمع صوت الشيخ وهو بيدعى.. يا رحمن يا الله
بنروح سينما وبنزور معرض الكتاب كل سنة
وبنشترى كتب وسى ديهات .. بنمشى على الكورنيش بليل ومش بنشترى ترمس علشان بنحب بلدنا تبقى نضيفة
بنكتب شعر وقصة وبنتكلم عن العنصرية ومارسيل خليفة والشيخ بتاع المسجد.. بنحبه زى ما بنحب قسيس الكنيسة.. وأطلقنا حملة.. لسانك سكر.. علشان إحنا ضد ظاهرة الشتيمة والسباب.. لسانك سكر.. بالنقاش والتفاهم .. بالحب.. وطول ما احنا عايشين .. هتلاقينا هنا كل يوم ..

أما عن خطوات الاشتراك فى الجروب قفد حددها مؤسسو الجروب فى الأتى:
أولاً.. قول لسانى من النهارده سكر.
ثانياً.. افتكر إنك راجل محترم وعقلانى وبتحب الناس يحبوك.
ثالثاً.. اعمل بكل بساطة دعوة لأصحابك.. فى حملة لسانك سكر.