أخواتى ..إخوانى..الأعزاء..بمناسبة العام الجديد قررت وعزمت على خوض الانتخابات وأتعشم فيكم خيرا وصوتك أمانه واللى تعرفه أحسن من اللى ماتعرفوش والانتخابات صعبه جدا لأن المرشحين قصادى فطاحل وناس كبيره قوى وواصله ومسنودة، والمعركة غير متوقعة وغير متكافئة، وفاجئونى بالترشيح بعد ما تعشيت كويس اتصلوا بيا وحبا فى بلدى وحبا فيكم ولمصلحة أبناء هذا الوطن وقبل ما خلص كوب الشاى قررت أخوض الانتخابات أمام أسماء كبيرة.
أحمد نظيف/الجمل/بطرس/عائشة عبد الهادى/أبو الغيط يانهار أسود ومخطط بكوحلى دى قايمة(١)
والقايمه (٢) فيها واحد (حضرتى) بس اتعشى وما خلصش كبايه الشاى ومتعشم فى ربنا ثم فيكم خير
وباختصار ياجماعه يا أخواتى ويا إخوانى ويا أحبابى برنامجى بسيط وأحلامى بسيطة منكم وليكم
حضرتى.. يرى كل أسرة أعلم بظروفها وظروف ولادها هسمع كلامكم عند وضع استراتجيه التعليم
حضرتى.. لا يعترف بأى قوانين تضر المواطن أو تحمله أعباء وضد فرض إتاوات بأى شكل.
حضرتى.. سيعمل على جعل مصر فى المقدمة ويجمع العرب على تقديرها وفلسطين أمانة.
حضرتى.. خطته ترضية العمال ومافيش سفر حريم للعمل خادمات وربط الحوافز بالإنتاج.
حضرتى.. سيمنح كل وزير حرية اتخاذ القرار ويحمله المسئولية ويقبل استقالته أو يقيله عند حدوث مصيبة
حضرتى.. هخترع وزاره جديد لأول مرة فى المنطقة العربيه وهى وزاره لتوقع وإدارة وحل الأزمات.
صوتك أمانة.. أخى.. أختى.. فكر جيدا فرصة كبيرة لتدرب نفسك على الإدلاء بصوتك.. فكر واختار.
"اختار اختار اختار" صوت تردد فى أذنى وأنا نايم فتحت عينى على صوت الزوجة وهى تسألنى عن الاختيار بين الذهاب لأمها للغداء الأول ولا الخروج معها قبل الغداء لشراء حذاء وشنطة الأول، وقبل أن أجيب صدمتنى بقولها "انت كنت بتخرف وما خلصتش كباية الشاى وسحبت"...إخوانى أخواتى صوتكم أمانه وفكر وقرر واختار بين قايمة (١) فطاحل
قايمة (٢) حضرتى.
مشاركة
اضف تعليقاً واقرأ تعليقات القراء
مشاركة
