عبد الرحمن سيد تمام يكتب..كلام معكوس من مراية الصمت

أدينى قاعد قدامك...
نفس القعدة بتاع زمان!
مستربع!
وعنيه بتسمع!
من نظرة عنيك ألحان!

بنشرب نفس القهوة
من (كنكة) شمسنا
لكن خساره!
مفيش فى ايدى ولا فنجان!

فاكر القهوة اللى من غير وش
كنت اعملهالك تفضل تنش
وتقرص ودني!
بحنان وتقولى
(وش القهوة بكارتها
لو راح تروح عفتها)
كلامك كان زى السما
بسيط خاااااالص
لكنه جميل!


كان ماسح دمعة قلبى
زارع الحب
ف أرضه
نجيل!
سافرت ليه
سفر ملوش رجعه!
مسروق منا
ولا بكره أبو أيد طويله
ف دمه السرقه!

كان نفسى أودعك
أشيلك شنطتك
وأعرف منك ليك عنوان!
يمكن عتابى يوجعك...
بس سامحني...
شحّت بعدك لقم الحنان!

يرضيك حالى كده؟!
قاعد أرسم ع التراب
بحتة صبار!
شمس نهار!
وملامح إنسان!

فيها كتير منك
غابت الصوره عنى وعنك
لمه الشمس ماتت
وشيعها السحاب!!